為了實現媽媽遺願，我成為了女兒國唐僧: K239

Q：「開心啦，再續前緣嘞。」
Y：「哎唷唷，有人兵變喇。」
Q：「兵乜鬼，畀妳要埋佢。」
Y：「佢仙都唔仙下，兵佢都唔知有無禮物收，我就唔做蝕本生意嘅。」如果唔係私底下…呢兩條女認真過份。
Q：「好掛住妳呀！Vienna，我哋可以一齊放飯喇！」
V：「做乜呀，先係兩堂無見咋喎？」
Q：「我係話，就嚟成年無同妳一齊食飯喇！咁我哋而家行咯。」
U：「慶祝妳兩個重遇，妳哋揀去邊度食啦。」
四個女神變五個，平均女神值重要有所提升，相信學校無一個男神敢貿貿然攝入佢哋中間；而我就算好彩有得同Vienna坐幾日，都絕對唔敢厚住面皮跟埋去食，再者呢個行為好燒錢我實在唔捨得。
我望一望傻仔健，佢竟然有得同Josephine一齊去食飯，重要望都唔望下我…係咪，出現喺我身邊嘅女神已經幫我趕走晒所有同性朋友，為咗懲罰我配唔上佢哋，最終我就要輸得一敗塗地，一無所有？




其實我都明嘅，如果Josephine三個女仔圈都入唔到，下場好可能就要自己一個食，難得有機會健仔又點會唔陪下人哋吖，我都無謂去做電燈膽阻住佢哋。
望住一個二個行出課室，我個心變得七零八落，或者我可以買燒臘飯返屋企食，又或者直頭返上去自己煮個麪，咁就可以慳返啲錢，又唔使自己一個出現喺學校或者餐廳…
「大佬爽，對唔住呀！可唔可以幫下我…」係肥豬朋友。
我：「喂，咪亂嗌好喎！我唔知道有乜嘢可以幫到你。」
「我未交暑假記趣呀，唔該幫幫手吖。」佢攞住週記簿…
我：「大佬唔好玩我啦，我數咗兩次齊先攞落去㗎…」
「我諗…我頭先係交咗上年嗰本週記簿出嚟。」
呢招，係我曾經用嚟拖延交功課時限嘅殺手鐧嚟。
我：「你咪自己交落去囉，Miss又唔多點鬧人嘅…」
豬：「喂！係咪去食飯㗎？係就行啦！」門口出面有肥豬嗌入嚟，隔籬重有隻細龜。




「嚟喇嚟喇！唔該晒大佬，下次小息請你食魚蛋…」講完條仆街就掉低本簿喺我枱面走出去…頂你吖，食完飯先交唔得嘅？放學再交唔得嘅？欠交唔得嘅？
重有隻死肥豬，明知我自己一條友孤伶伶都唔問我一唔一齊食，好明顯就係唔妥我今日嘅豔遇，唉…
落到去敲門，好彩個傻豬Miss重喺度。
我：「呀邊個交錯簿呀，呢本先係啱嗰本。」
鄧：「我知呀…嘻嘻…嘻嘻嘻…」佢手上面攞住本週記簿嚟睇，而且重有其他先生批閱嘅字。
我：「你睇人哋以前嘅週記咁缺德嘅？」
鄧：「悶吖嘛，睇其他先生寫嘅嘢其實幾得意。」
我：「妳覺得最好睇嘅週記係乜嘢topic？」