為了實現媽媽遺願，我成為了女兒國唐僧: K238

去到隔籬課室，好彩先生重未到，只不過我放眼一望…
豬：「你又成轆木企喺度做乜？家陣無位你坐咩？」
QQ同YY兩個繼續姐妹丼咁坐，肥豬就同隔籬班friend坐，其他人都好似covalent bond咁form晒做gas molecules；即係如果我肯定自己要做排長嘅話就無乜所謂，最弊係而家窗邊行重有一個吉位，而隔籬位竟然係Wendy！乜佢唔係讀文科㗎咩？
如果我特登唔同佢坐，就實在太過非常唔自然。
況且呢度好多人知道我同佢坐過，並且認為係好朋友。
我：「哈…點解妳會喺度…文科會讀附加數嘅咩…」
W：「我揀唔落第三科，發現原來可以攝堂M1落去，所以咪過嚟試下堂囉。」
我：「原來係咁…妳對數學咁有興趣…」
W：「無乜，只係好過中史少少，亦唔係為咗同你上堂。」屌…點解我第一下會聽咗做同你上床…
一個好女仔，一個我唔係唔鍾意嘅女仔，而我哋係無可能有結果，咁樣其實都係一種痛苦，我寧願轟轟烈烈愛過之後俾人飛又好，戴綠帽又好。




我：「明嘅…暑假過得開心嘛？」無可奈何嘅我只可以問埋晒呢啲無營養話題，但如果唔講嘢嘅話就更尷尬。
W：「咪又係咁，你攪得掂個女神未呀？」
我：「攪乜鬼吖，人哋暑假成日拍拖都不知幾幸福。」
W：「你真係好犯賤，好彩我唔會學你啫。」
我：「關乜事吖，佢一日住喺度，我同其他女仔都唔會有可能㗎喇，除非要我講大話呃人啫。」
W：「你又唔係未試過…頭先見到你同一個超靚嘅旗袍女仔行埋一齊喎，睇嚟你嫌其他男仔對你嘅仇恨值未夠高。」我只係想降低妳對我嘅仇恨值…
我：「意外嚟㗎咋，而且個女仔係Queenie個friend。」
W：「我警告你唔好再䚎我衫袖呀，告你性騷擾㗎。」
我邊敢吖，坐喺度郁多一下都覺得唔自在。然而我發現咗原來Zilvia同另一個又高又文靜嘅眼鏡妹坐咗喺我後面，真係估唔到Zilvia重會有其他熟嘅女同學，竟然唔黐返埋去QQ嗰邊；佢對眼永遠就係咁水靈清澈，有時會無乜表情咁望下我，完全分唔到佢係已經看透一切定係無視緊我。
呢堂先生喺度教central tendency，即係mean mode median，但係我個腦就一大堆circle，eclipse，parabola，同心圓，流體力學，鐘擺運動，木瓜接枝，pubic hair…都唔知做乜㞗。兩堂話咁快就完。




W：「我走喇，下堂再見。」佢講完就攞住本書行去另一邊…如無意外呢啲合拼堂都唔會再調位，即係我重要有排對住佢？重有另一個問題就係QQ都喺度…