thriXt Qantasy 純文字安眠之作 (New: - U2K - 一直上架): K240

鄧：「最好…好似愛情小說咁，如果有個傻仔寫佢暗戀邊個女仔，我實笑餐死。」呢個先生嘅品格實在值得懷疑…
我：「係咪妳自己dry得滯，先要睇啲無謂嘢嚟解悶？」
鄧：「你理得我吖！」然後佢冚埋本週記簿放喺枱面。
我：「咁妳最唔想睇到嘅係乜嘢topic？」
鄧：「咪果啲海馬公園，天壇大佛，你知唔知呀，曾經有個學生寫科學館將網上個展覽簡介原汁原味咁抄落去，激到我差唔多想叫佢重寫添呀！」
我：「乜妳會鍾意自己搵嘢嚟做嘅咩…對唔住呀，我都係寫咗去行獅子山，悶親妳唔好意思呀下。」
鄧：「放心啦，我會畀個閱字你。」
我：「不如…下次寫女神內衣一週配搭的藝術？」
鄧：「你試下？！我見到會即刻掉落碎紙機。」
我：「其實做乜要搵我做科長嘅？我都唔鍾意做嘢…」




鄧：「你得閒吖嘛，搵你做嘢唔使擔心同其他先生爭。」
我：「都重有好多其他同學得閒嘅啫。」
鄧：「叫你做嘢唔會有壓力，Queenie又會睇住你，就係咁簡單。」
我：「哦…妳lunch食三文治夠飽㗎嗱？」
鄧：「無乜心情出去食，我重有好多書要溫。」
我：「係因為溫書，定係因為無阿sir約妳食飯咋？」
鄧：「走呀！如果我重讀緊書一定一腳踢死你！」
※※※※※
我：「五個人會唔會難搵位，或者我哋去飲茶？」唉…真係頭痛，本來四個人坐卡位好地地…
Y：「無所謂，但我唔去對面邨嗰間㗎，啲嘢食好hea。」放心啦，先唔會去個死人頭間公司…




我：「一係行去遠少少個商場頂樓嗰間？」
U：「大熱天時喎，一係搭的士去帝京軒趕唔趕得切？」
Y：「我無聽錯呀…妳都會怕曬嘅咩？」
U：「我唔怕啫，曬親Zilvia同Vienna好似唔係幾好…」
Z：「無所謂嘅…而且而家變咗要兩架的士。」
其實…女人真係好麻煩，雖然我自己都係其中一份子。
可惜嘅係，當我哋去到校門嘅時候，就知好多嘢唔到我哋自己決定。
V：「劉管家！點解你過咗嚟㗎？！」
管：「小姐午安，妳爹地話妳第一日返學，學校又無canteen，唔知有無同學同妳一齊食，驚妳無啖好食，我今朝喺附近study過都係得啲舊式茶餐廳最多，所以幫妳買咗外賣…」佢管家係一個五十幾歳嘅男人，但就重係keep得好fit，著住恤衫長褲嘅佢孭住一個保溫袋，有啲似高級版嘅外送動物。
V：「咪話咗唔使理我囉！我點會無friend呀？！」佢一隻手搭咗落我膊頭，睇嚟對管家嘅干涉十分不滿。




管：「妳好呀…妳咪係…嗰陣時細細個一齊學溜冰個女仔…好似係叫…叫…」
我：「劉uncle你好，我係Queenie呀，會幫手睇住小姐，所以唔使擔心佢㗎喇。」
V：「咁管家你食咗飯未呀？」
管：「呢層…今朝study嗰陣已經順便試咗兩間餐廳…呢個係小姐妳鍾意食嘅海南雞飯嚟㗎。」
Y：「噢，K11文華雞飯，好味呀！」