為了實現媽媽遺願，我成為了女兒國唐僧: K235

V：「無所謂呀，請隨便。」
『氣若幽蘭』佢喺張紙嘅右手邊打直咁寫咗四粒楷書字，我唔識分乜嘢鐵劃銀勾，但肯定係工整美觀。我亦記返起QQ曾經同我講過呢四粒字。
眾女神望住啲字若有所思，至少無開口彈佢先。
V：「可唔可以借畀我試下？」
慕：「無問題，請隨便用。」佢將筆交到幽蘭手上。
佢先係攞起枝筆，喺張廢紙上面印咗幾下，再轉用一個比較特別嘅手勢夾住枝筆桿較高嘅位置。
V：「想問下你個名係咪天行？」
慕：「係呀，我都無講就俾妳估中咗…」
未等佢講完，幽蘭已經喺張紙上面大筆疾揮，我無形容錯㗎，佢寫字嘅速度真係快一截，姿態，動作，字體亦都完全唔同…感覺係一氣呵成，而唔係逐字勾勒。
『天行健　君子以　自強不息』三行打直嘅字填滿晒張紙嘅所有空位；除咗QQ外，其他三位女神都望到入目三分咁，對比起頭先嘅思考中保持安靜，今次確實係驚嘆到無話可說。




我唔識形容，如果眼前嘅係藝術，Myth嘅作品就只配叫做企理；正如Angel係一個好順眼嘅靚女，但就算波波唔大，佢都永遠及唔上更加平嘅Zilvia。
慕：「係行書…」佢已經再講唔到多餘嘅廢話
V：「嗯，好少寫咁細隻字，好似有啲失準…呀，借把間尺嚟畀我吖。」佢擰轉面同我講。
然後佢就用間尺將張紙撕開咗做兩邊。
V：「嗱，畀你當做回禮啦。」
慕：「感謝賜教，我要返去勤力啲練字…」
嚴格嚟講佢係直接畀幽蘭收咗皮，而三女神重陶醉緊。
我：「唔得，等我都攞返枝塗改液嚟練下字先！」
Q：「你收啦！顧住喺度睇戲，乜你點齊功課之後唔係應該要即刻交落去嘅咩？」
我：「死火！睇得太投入無咗件事…下個小息囉。」




然後話咁快就到咗下個小息。
V：「科長，不如我跟埋你落去，你帶我行下吖。」雖然唔知點解佢嗌我做科長，但呢種叫法無乜壓力幾好。
我：「可以呀，咁Q…Queenie一唔一齊呀？」
Q：「唔喇，咁多人落去做乜，我放學再帶佢一轉啦。」佢表面上係咁講，但我feel到佢哋四女有欬想謦。
V：「係呢，你攞住咁多嘢都唔搭（車立）嘅？」
我：「平時學生唔搭得，我唔識分乜情況先搭得喎…」
V：「咁不如我幫你攞緊啲？」
我：「唔使啦，又唔係好重，如果俾Queenie知道我要妳幫佢實鬧死我都似。」
V：「你同Queenie好熟㗎？」
我：「上年同佢坐過，隔籬位friend囉，叫做幾好謦，不過我事先聲明我唔係佢隻兵嚟㗎。」