為了實現媽媽遺願，我成為了女兒國唐僧: K236

V：「但係位Yvonne話你係佢隻兵嚟喎。」
我：「哎吔，女仔講嘢好蠱惑㗎，雖然妳都係…」
V：「係呀，所以我明囉，想問下學校入面係咪好多男仔做兵㗎？」我剩係知妳經過不論老師同學全部都注視住。
我：「做兵…係喎…妳女校應該無呢枝歌仔唱…」
V：「都唔係㗎，有啲TB或者TBG都有機會嘅，雖然唔多…同埋會有其他學校啲男仔吖嘛。」
我：「又係喎，我都無諗過，兵呢家嘢…或者男班長想做掛，我畀啲background information妳啦，Zilvia就驚男仔嘅，Uranus就女強人專趕走晒啲仔，所以佢哋四個都好似無乜兵，不過佢哋收兵嚟做乜喎，四個有錢女本身就自給自足。」
V：「係嘅，而且Queenie有男朋友添。」
我：「嗯，原來妳都知道。」
V：「不過係上年嘅事嚟嚕，佢哋重一齊緊吖嘛？」
我：「一齊緊呀，聽落關係好似幾穩定。」




V：「咁就好，真係羨慕死人。」
我：「妳使乜羨慕呀，出句聲嘅話，我諗啲男仔即刻排隊交form申請，隊尾排到去羅湖橋啦…」
「咦！爽仔你居然幫先生手做嘢？！」佢明明係同我講嘢，但係隻眼就望到Vienna實一實。
我：「係呀黃sir，被迫㗎咋。」
「咁咪幾好，充實啲…」佢一路上樓梯繼續望落嚟。
鬼唔望佢戟親轆落樓梯，不過左女神呢個look邊忍到…
我：「嗱，呢度就係教員室嚟嘞，有三道門，第一道主要係主科嘅先生，第二道就係理科，再打落去就係文商科同埋啲無謂科嘅先生，兩道門中間各有一個corner喺畀兩個副校坐嘅，大致上都係咁啦…」
我敲一敲門搵Miss Tang，佢就叫我自己行入去；呢間學校有個無聊規定，就係基本上初中生唔入得去，只會老師出嚟攞嘢，而高中生就可以喺先生嘅呼喚下依據正確路線行埋去佢個位度；我當然唔會羨慕呢啲權利，以前最憎要落嚟教員室，雖然我慣晒喺條走廊度俾人訓話。
不亢、不卑、不戰、不和、不降、不守就係我態度。
我：「我入去交嘢先，妳喺度等一等我吖…」




入到去就見到個傻豬喺度溫緊DSE，搲晒頭咁款。
我：「啲功課喺晒度，數過已經收齊晒。」
鄧：「算你啦，通常你肯交嘅話就會收得齊。」
我：「做乜咁話我喎…溫DSE好似好辛苦咁。」
鄧：「死仔包潤我？唔好講到好似你唔使溫咁。」
我：「咁起碼我唔使而家就開始溫吖。」
鄧：「你唔好到中六先嚟溫呀，死人冧樓㗎…呀，不過而家唔使勞煩我叫你溫書啦，自然就會有人督住你。」