為了實現媽媽遺願，我成為了女兒國唐僧: K234

V：「嗯…呢朵花…曾經喺我學校出名過一排。」
Y：「吓…一朵摺紙花都可以出名？有乜故事？」
V：「曾經有一位女神級嘅師姐，佢喺聯校音樂比賽晚會上面收到一個男校男神送嘅花，就係一千三百一十四朵新川崎玫瑰，當時都幾哄動，然後好多男仔走去學摺。」
Y：「咁佢哋有無一齊到？」
V：「有就有…不過事隔幾個月，位男神就出咗聲明，話自己一朵花都無摺過，全部都係位女神買返嚟再迫佢埋單喺嗰晚送畀佢，之後重講咗啲好難聽嘅說話…」
慕：「Vienna妳之前讀名校嘅？」
V：「普普通通嘅女校…無乜特別。」佢好似面有難色咁…
Q：「喂，整一三一四朵嚟，陪你行一日街嘞。」QQ見狀即刻出手相救，不過啲方法就真係…
慕：「妳肯定…係得一日？」
Q：「半日㗎咋，行街食飯睇戲咁囉。」




慕：「唔好整蠱我啦，想摺死我咩，如果有得交往下嘅話呢…」QQ講得無錯，佢係prefer呢啲博大霧式嘅flirt女。
Q：「摺唔死，鬼知你摺定買咩，如果想交往下就再加多五十二萬朵啦。」
Y：「哈哈，好嘢，一朵十蚊都要五球幾。」
呢啲情況QQYY當然係應付自如，睇得出Uranus都想講啲嘢嚟串下男班長，但一副欲言又止嘅樣可能怕講錯嘢。
慕：「女神大人有大量，請饒恕小弟嘅不自量力。」
Q：「吖，你好人好者點解會無端端有珠光紙喺身嘅？」
慕：「啊…呢啲係用嚟平時練書法用嘅…」
Y：「係喎，無記錯你好似上年校內比賽攞咗個第三。」
慕：「呢啲…我輸咗嘅嘢就無謂記住啦。」我唔會認佢係男神，但呢個男仔真係會搞埋好多花臣嘢。
Q：「你都幾大嘥，用啲咁靚嘅紙嚟練字…」




慕：「講大嘥嘅話…我未必追得上妳哋幾位喎。」
V：「你係寫開書法嘅？」
慕：「嗯，睇下，呢枝就係吳竹嘅万年毛筆。」佢喺衫袋揞咗枝純黑銀扣嘅靚筆出嚟，打開個蓋竟然係毛筆。
呢條友令我諗起多啦A夢入面隻小夫，好似全身都係玩具咁，只不過佢重靚仔過出木杉；唓，好叻咩，我玩文具嗰陣你重讀緊小學咋。
V：「我都想買枝，好似幾好用，但香港唔係成日見。」
慕：「係呀，我咁啱去日本旅行見到咪買囉，好少科學毛筆用真毛㗎，呀，不如我示範下…」佢個位唔係好遠，轉頭攞咗張練字紙過嚟。
我承認多才多藝對溝女係有幫助，亦相信佢係一個有啲計嘅人，至少一定好過阿健好多；不過你要知道嘅係，呢幾個女仔係大佬中嘅大佬，重要有兩隻異性絕緣體喺度。
慕：「Vienna，唔介意我寫妳個名吖嘛？」