為了實現媽媽遺願，我成為了女兒國唐僧: K209

Z：「畀埋你…我用唔著。」佢呆下呆下放低咗朵花。
Y：「黃色唔啱我，唔爭在啦。」
出師不利嘅男班長雖未至於垂頭喪氣，但都只能啞口無言咁返埋位，而Uranus就跟大隊傳埋朵紫玫瑰過嚟。
呢個男班長真係夠晒無聊，肯定係趁頭先影相嗰陣偷偷地摺㗎啦，我見重有啲時間就摷下自己個書包，俾我搵到張淺藍色嘅單面活動簡介。
我：「登凳，我幫妳哋四個整咗個花盤，以後就可以擺埋一齊，一定可以相見甚歡，水乳交融…」我將個藝術品放咗喺QQ同YY兩張枱中間。
Q：「喂！你唔出聲無人話你啞㗎！」
Y：「男仔果然真係夠晒無聊，你都可以話係極致嚟。」
U：「呢個叫花盤？好似係兜，定係叫箱合理啲。」
Q：「是但啦，擺埋一齊都幾好睇嘅。」
Z：「又會啱啱好size嘅…」佢攞咗部電話出嚟影。




不過預備鐘聲暫停咗我哋嘅膠劇，班主任亦都返咗嚟。
鄧：「好喇，各位同學快啲執拾好，我哋要去禮堂聽校長講嘢喇，一陣就跟返學號坐先啦，唔好亂呀知唔知？」
我：「Miss Tang，妳個樣咁興奮一定係好期待校長嘅演講嘞！」
鄧：「你個死仔包唔好玩我啦，再對多三年實頭痛死。」
豬：「我知！梗係因為有得提早收工而興奮。」
鄧：「無呀，邊有吖…我等放飯咋，下晝重有好多嘢做。」係嘅，教書都真係幾慘下，重要對著我…
正當我執拾好細軟準備起行嘅時候，QQ捉住我咬耳仔…
Q：「喂，幫我收埋盤花入去你locker先。」
我：「吓，你哋唔係唔鍾意嘅咩？做乜又…」
Q：「鍾唔鍾意係一回事，但呢嚿嘢始終都係人哋親手整出嚟，我唔想一陣返嚟見到變成一坺柿餅喺我枱面。」右女神佢環視四周觀察，呢種小心眼都唔知好事定壞事。




我：「我明喇。」於是我即刻包起跑咗去放locker，然之後先跑返嚟同其他人集合。
開學日因為大家唔係咁熟，所以係唯一會乖乖地跟返先生安排坐嘅日子嚟，由中一至中六逐班同學列隊行入去，實在係浩浩蕩蕩，勞民傷財，坐低都搞咗十分鐘。
開學日最不得之了嘅就係除咗學生要乖乖坐喺度，就連先生都要乖乖跟返倫次咁坐喺台上面，訓導巡咗兩圈確保所有學生正常之後就安排先生列隊入嚟行上台；欸…傻豬Miss Tang竟然係坐中排，而詩敏Miss就可以坐前排，喺數學科主任隔籬，唔睇得小。