thriXt Qantasy 純文字安眠之作 (New: - U2K - 一直上架): K208

佢好似變魔術咁，打開右手攞咗朵鮮紅色嘅紙摺玫瑰花出嚟，放咗喺QQ嘅枱面，我喺後面望過去都見到幾靚，同我小學嗰陣會摺嘅四瓣百合唔係同一個level；不過先唔理摺紙呢啲小學生玩意重合唔合時宜，開學日走嚟送花畀個女仔都夠晒那個司馬昭之心，睇嚟呢條友唔係玩㗎喎。
Q：「哦，乜咁客氣呀，多謝…」女神亦禮物照收。
Y：「如果無記錯嘅話，你都攞過我粒朱古力。」呢啲女仔真係唔惹得，正一小氣鬼，得罪佢記你一世仇。
慕：「係嘅，我都早有準備，如果你唔介意嘅話。」佢放咗另一朵淡黃色嘅玫瑰喺YY枱面。
Y：「喂，點解佢係紅色，我係黃色…」
慕：「係嘅，妳哋都有，就當係一份小小嘅見面禮啦，希望我哋嚟緊可以合作愉快。」佢無理到YY嘅投訴，將一朵紫色玫瑰放喺Uranus度，最後Zilvia就係粉紅色嘅，佢呢個突如其來嘅舉動攪到兩位女仔唔知點好，其他同學都望晒過嚟。
「嘩，真係好開心喎，女神一開學就有花收！」某姣閪…
「掂呀，Myth哥一開學就主動出擊，重唔溝死女？」某花生友嘅攞景贈慶，而唔係跟尾狗嘅吶喊助威。
Y：「慕容公子，多謝你嘅好意嘞，不過…如果你係諗住嚟溝女嘅話，呢邊好似無乜supply。」佢望一望Uranus同Zilvia先講，似乎女仔間一個眼神就互相知道大家對某一個人有無興趣。
我唔清楚Myth嘅感情史係點，但我深知YY就一定係老江湖，年齡上面亦都係屬於姐姐，當然可以輕鬆咁應對呢啲普通層次嘅挑逗。




慕：「傻啦，做乜大家咁認真，只係小小心意嚟。」
「男班長嘅心意，只有女神先配收到㗎咋。」
「係囉，哈哈，唔知女班長佢又收唔收得到呢？」
呢邊已經夠無聊，啲花生友就重無謂，攪到大家尷尷尬尬咁，等我去派下膠先。
我：「嘩，Myth哥你摺朵玫瑰真係鬼火咁靚呀，作為為全班同學服務嘅男班長，開學日好應該每位同學派一朵做見面禮啦！」
「噢，係英雄救美！」「唔係，係比武搶親至啱。」
慕：「阿爽同學咪玩我啦，男人老狗收玫瑰好意頭咩？」
我：「係咪有得揀㗎？我想要朵奇異花。」
Q：「嗱，你係咪鍾意？攞去啦。」佢毫不猶豫放咗喺我枱面，攪到Myth佢面色大變。
慕：「Queenie，妳都唔使咁對我…」佢塊面仍然保持住微笑，但就非常之難睇，十分奇怪。




Q：「無呀，咁係你送畀我㗎嘛，送咗就即係我㗎啦，我可以決定點處置，如果你唔想送嘅話我歡迎你收返㗎。」
慕：「咁又唔使…」同前面兩隻鬥嘴可以話死路一條。
點知呢個時候Zilvia佢企咗起身行埋嚟我張枱側邊。