為了實現媽媽遺願，我成為了女兒國唐僧: K207

我：「我咪影完相囉，Miss妳重想點呀？」
鄧：「可唔可以幫我抄啲相落電腦…同埋…校網呢度話啲相要壓到去千二乘千六先upload到，幫我搞搞佢吖。」
我：「妳估下千二乘千六BMP檔up唔upload到？」
鄧：「哎吔，唔知你講乜呀，總之幫下我手啦。」
我：「知唔知壓榨學生勞力係唔應該㗎？」
鄧：「知唔知上堂唔專心聽書都係唔應該㗎？」
OK，you win，情緒勒索我呢招都出埋…
我：「搞掂喇，我可以返埋位未呀？」
鄧：「吓！咁快？三十幾幅相喎，點解咁快嘅？」
我：「Set好咗格式咪control all批次轉換囉…呢啲…唔係呢個年代嘅常識嚟嘅咩？」我成部腦啲寫真集分分鐘高過我個人，執幾十幅圖呢啲嘢係易過賣火柴。




鄧：「啊，係嘅，無錯…證明我搵啱人，科長你都幾做得嘢呀下，返埋位啦。」我極度懷疑佢除咗中文重識乜？
攪多兩攪就到咗第二個小息，因為今日啲堂係短啲嘅，陣間去禮堂聽埋校長廢噏就可以放學走人。
慕：「好耐無見喇，Queenie。」佢行咗過嚟。
Q：「欸…唔知有乜嘢可以幫到你呢，男班長？」
Y：「做乜咁錯蕩呀？慕容公子別來無恙吖嘛？」
認真講，如果唔識佢哋四隻嘢嘅話我覺得係生人勿近嘅，齊章嘅女神黨絕對係有個結界圍住佢哋，一行埋去就好似海鮮檔揀蟹咁全部起晒螯；Q同Y兩個牙尖嘴利不在話下，平時已經夠晒嘈，U對男仔嘅狠就更加係接近言語暴力，剩返嘅Zilvia就郁都唔郁，完全無視咗身邊嘅男班長…
慕：「啊，幾好呀，有幸同到妳哋班係一件樂事。」
U：「真心？你咁樣走過嚟唔驚危險咩？」
慕：「傻啦…小弟我早就慣咗俾你哋幾個圍住㗎啦。」
U：「你係咪未食藥？我哋幾個何曾試過得閒圍住你？」




慕：「女班長請妳唔好誤會，我只係講學業成績啫，過往幾年，小弟嘅排名都係俾妳哋幾位女神夾住㗎啦。」
U：「唔使抬舉我哋嘞，有嘢就講啦。」
唉，你哋咁樣返學唔攰嘅咩，睇住啲校內上位同學喺度高手過招，聽到都覺得心累。呢個男班長outlook係幾好嘅，身高大致同我差唔多，但其他嘢就整齊企理好多，係咪好靚仔就見仁見智，不過讀得書，有錢使下就係肯定嘅事嚟；吸引嗎？我唔識評論，但感覺上QQ同YY嘅男朋友都係類似呢等人。
我覺得瘟神或者重貼地啲，雖然都唔係好東西。
慕：「Queenie，記唔記得中二嗰陣情人節收完妳粒朱古力我話要回返紮花畀妳，後嚟調咗位無咗件事…」
Q：「嘩，呢啲陳年往事就唔好攞出嚟講啦…以前啲人情朱古力我都係周圍派，邊個收過都唔記得喇。」
慕：「唔緊要，呢度象徵住我嘅小小心意，希望嚟緊呢三年同窗生涯我哋可以融洽相處，友誼永固。」