為了實現媽媽遺願，我成為了女兒國唐僧: K185

我：「未打過呀，都可以試下嘅，我平時會打康樂棋。」
「哈哈，我細個嗰陣都成日打康樂棋，不過㧻波唔同，啲波會轉，次次出cue個位都唔同，同埋康樂棋多數上手揸cue，枱波就要下手揸cue。」
我：「啱啱睇完你哋打，有個大概嘅…」
「你身高打枱波無問題吖，分分鐘英式桌球都得，你識唔識分呀？」
我：「識嘅，麻鷹都識打嗰啲吖嘛，有好多粒紅波。」
「哈哈，好懷念，以前返學成日聽到，入到U o camp都重玩緊…」同系列重有豹聞底褲，狗養大明，蝦攪燒賣，蕉不保值，一波三折等等…
「畀你試下吖，用粒白波射去嗰粒波度…左手咁樣set個炮台，右手就放鬆推枝cue。」
我跟住佢嘅姿勢起手成功推郁粒白波，重撞埋目標。
「睇嚟真係有㧻開嘢喎…不如我哋嚟打返場吖，見你第一次打就讓你一個double，我每次打一cue，你就打兩cue，但要掂到波都先計數㗎。」其實康樂棋都有類似嘅嘢嘅，我身為小朋友亦好歡迎佢讓我。
然後我哋執返晒啲波放落個三角框度，佢好純熟咁排好位放埋喺粒點上面。




「你開波先吖，你打實色，我打間條，打最出嗰粒一號黃色波就得。」由於我有兩cue，可以輕鬆咁拆開啲波，而且第二cue就已經入埋粒一號波落中袋。
當然薑係老嘅辣，當實色波越嚟越少，佢set咗我兩下士碌架，我根本連波皮都掂唔到就無咗孖cue嘅優勢，重送埋個自由球畀佢，好快就俾佢追到一實色一黑波。
兩粒波係同一邊，我唯有好細力咁堆個白波埋去掂一掂，第二cue直頭差啲掂唔到，好彩。
「哎吔，封返我條路添呀？」不過佢一啲都無猶豫，一下撞牆就分返開兩粒波，重將我粒實色撞咗去對邊黐cu；我唔識點樣撞到粒波之餘又可以煞停粒白波，結果兩下都係長枱射唔入，最後佢入埋粒黑波。
「打得幾好吖，如果練返幾個月就應該有得打下。」
我：「出面唔多地方有得玩，一係就畀錢，邊有咁多機會練吖。」
「大個啲就會有機會㗎喇，不過呢啲嘢其實玩得叻都無乜用。」
我：「唔係呀，我覺得哥哥你㧻波嗰陣好型。」
「香港得一個傅家俊同一個吳安儀㗎咋，你打唔到去呢個水平就係浪費時間同金錢。」
我：「不過…應該都可以溝到女？」




「哈哈，呢個年代…匿喺屋企打傳說都可以溝到女啦，重輕鬆方便，雖然唔想教壞你，但打機啲傻妹重易食。」
我：「你唔會覺得Kuromi係傻妹呀？」