為了實現媽媽遺願，我成為了女兒國唐僧: K184

QQ無再坐喺度同佢哋玩，起身去雪櫃開咗枝somersby。
我：「對唔住呀，Queenie…」
Q：「關你乜事，佢意圖好明顯吖，當其他人打個和，我同你係一定唔會夠阿健同佢砌，我又唔係玩得叻。」
我：「唔好唔開心啦，或者我同妳返去都可以練多啲…」
Q：「傻嘅咩，有時間不如做多啲其他有意義嘅事重好啦，我無唔開心，因為都知遲早會發生呢啲事。」
我：「係嘅，真係諗唔明…欣姐做乜要咁樣整鬼妳。」
Q：「有幾難明呀？女仔嘅嘢，睇唔順眼就係咁㗎啦。」
我：「吓，先第一日識，重要係會友嚟，為乜喎。」
Q：「點知，可能佢睇過我直播覺得唔抵得掛，女仔要爭風呷醋起上嚟真係好恐怖，唯有當我靚女得滯得罪人啦。」女神真係女神，安慰自己嘅藉口都咁堂皇。
A：「唔使唔開心喎，阿Yan佢有時係咁，打起機上嚟就成個細路女咁，明明聽日就year 2。」




Q：「Enjoy遊戲係好事吖，如果唔係點玩到幾千場。」
A：「佢用阿茲卡成精㗎喇，我差唔多無見過女仔可以比得上佢，如果唔ban佢王牌真係會好危險。」
Q：「多謝你嘅資訊，但我都未必再有機會同佢咁打。」
A：「打唔打都唔緊要啦，一山還有一山高，無人可以天下無敵，我哋幾個都知Kuromi妹妹妳直播嘅賣點，做返自己就得，唔使有hard feeling嘅。」
Q：「無囉，我又唔係為打機，邊有欣姐呢啲咁恐怖嘅毅力，我係為咗少少零用錢㗎咋，你都好清楚。」
A：「可能都唔止少少，哈…不如咁吖，我哋試下幾個主播開返場睇下效果會點好唔好？本身佢哋好少玩中路…」
就係咁，我哋又開咗兩場打，主播實力實在係不容小覷，兩個梅花間竹咁助攻QQ簡值係遇神殺佛，會長本身亦都好有實力，我同QQ只係需要好簡單做返份內事就已經輕鬆咁贏咗。
我：「嘩，再咁排落去咪分分鐘一晚上到傳說？」
「咪傻啦，連贏幾場之後server就會派神隊同你打。」
「頭先對面其實唔弱，我哋勝在面對面可以即時溝通…」




主播真係主播，對遊戲嘅睇法同我哋凡人差天共地；我見有個哥哥仔係咁睇住我哋玩就讓咗我個位畀佢，QQ就同兩位主播研究下啲代打同帶分嘅行情，重有小號拖分技巧…我覺得有啲悶就又起身食下嘢，去雪櫃攞咗罐zero飲，然後去睇人打枱波，係呀，工會網聚都重有人會玩傳說以外嘅嘢，係一個大哥哥同個OL樣大姐姐。
「哈，輸兩粒啫，咁應該要當我贏啦。」
「傻啦，我覺得女仔識㧻波已經係贏咗。」
大人講嘢真係唔同啲，唔知我同QQ第時係咪都會咁呢？
「我去搵啲妹唱下K先，下次再同你打過。」
「好呀…David仔，你係咪又想打呀，以前有無打過？」佢擰個頭嚟問我，身為大大哥哥嘅佢當然稱呼我做乜都無所謂，我呢個酒樓啤酒仔早就已經慣晒。