thriXt Qantasy 純文字安眠之作 (New: - U2K - 一直上架): K186

「無人叫你望到咁高喎，女神食返你就有份。」
我：「係呢，好似唔見你開隻game嚟玩嘅？」
「其實我好少玩㗎咋，通常係陪人玩先會開一開。」
我：「你都幾特別㗎喎…唔多玩又入工會，嚟食女？」
「唔係呀…其實Alex佢係我條女個細佬嚟，見佢搞function咪嚟支持下，你唔好亂講嘢靠害呀下。」
我：「原來係咁，你又會自己一個嚟嘅…」
「女朋友重返緊工，我等到夠鐘就去接佢㗎喇。」
我：「又會咁夜都未放工嘅，真係陰功。」
「一般般啦，做飲食業係咁，人哋放工都重要食嘢。」
我：「咁我明喇，我都係平時放十二點嘅飲食業一員。」




「吓…你唔係中學生嚟咋咩，做啲乜呀？」
我：「哦，兼職搵下錢啫，我喺酒樓做執漏清場，所以係最遲走嘅一個。」自從識返工之後，我每次同大過我嘅人謦欬都好似變得特別理直氣壯，等佢哋唔好當我係個死細路；不過比起QQ，我應該算係甚麼也不是…
「又估唔到喎，你都幾特別，其他人去企M記你就去做酒樓，乜呢個位唔係通常得啲退休阿叔做嘅咋咩？」
我：「你唔睇我個樣其實我同佢哋都無乜分別啫。」
「哈…咁又係，繼續俾心機供養女神啦，我返去同佢哋吹水先。」唔知由幾時開始，佢哋枱面已經由汽水變咗做威士忌，大人嘅世界真係吖…
正當我諗住返埋去五排嘅時候，我見到兩位小妹妹，呀sor…啱啱同大人講完嘢以為自己都大過埋添…更正返係兩位小姐姐喺度纏住Alex會長。
A：「做乜咁早走呀？十點半都未夠喎…」
雯：「我細路女嚟㗎咋，應承咗屋企人要十一點前返到去。」嗯，乖乖女好，唔似得某隻躝街嘅蚊。
A：「妳十一點嘅話，咁妳家姐應該起碼十二點啦。」
瑩：「咁我無理由自己留喺度玩㗎…」




A：「所以有家姐看住，應該兩個都可以十二點返先係。」對於我嚟講，呢啲對話就好似天方夜譚咁。
瑩：「咁我唔可以帶壞細妹嘛，會俾人鬧㗎。」
雯：「咪癲啦，唔想我哋下次嚟唔到就乖乖放我哋走！」
無論點睇，呢兩姐妹都係阿妹曳過家姐，幾得意。
Q：「咳咳，其實我都差唔多喇，我係一個乖小妹妹嚟。」QQ明知Alex知道佢性感主播嘅身份，擺到明講反話畀佢聽，但佢為乜要咁早走，跟風型啲嘅咩？
A：「好好，乖女返屋企無問題，等我影多兩張相先…」
雯：「又影？！頭先食嘢嗰陣咪影咗囉…」
A：「妳明唔明呀？一個group想要有多啲女，咁首先個group要有女先，妳都唔想次次function來來去去得妳哋幾丁女㗎？」男有男丁，女丁我真係第一次聽到…
會長今次又講得幾有道理，如果唔係喺工會個page睇到有女仔參加活動，我諗QQ都未必肯join。