為了實現媽媽遺願，我成為了女兒國唐僧: K178

A：「你哋好呀，睇嚟…你兩個就係Kuromi嘅friend嚟，我就係工會會長，可以叫我Alex。」搵都唔使搵阿會長先生就出嚟接我哋，係一個大哥哥嚟，雖然論魅力值就點都爭團長一大截，但睇得出係一個玩得嘅social撚嚟嘅。
我：「嗯，我叫David，佢係阿健，Kuromi喺出面洗手間執一執先，陣間就會過嚟，呢度五百蚊係我哋兩個今日嘅參加費。」
A：「非常多謝支持，入嚟隨便玩啦，嘢食等多陣就會到，可以食住啲零食先，雪櫃入面嘢飲可以任攞。」
Alex嘅目標當然唔係我哋兩隻契弟，所以我都懶得理佢，第一時間入去兜個圈睇下會唔會有熟人…安全！呢個場都算OK大，在場已經有十七八丁友喺度，我認得出雞煲相嗰兩個靚妹喺度唱緊K，有幾個男仔圍住佢哋。Party room當然唔少得遊戲機，一張長L型梳化中間有張茶几上面放咗部PS5同Switch，啲game例牌係Fifa，NBA，GT，街霸，大亂鬥，Mario Kart同Party…不過五條柒菇碌嘅仔仔就已經排排坐喺度打緊五排，你話點溝女吖…
Sorry，啱啱再多咗兩條磨碌入嚟…
嗰邊有人掟緊標，重有幾個明顯啲係大個啲嘅，坐喺另一張梳化玩緊Jenga即係層層疊，鱷魚牙醫呢啲確保自己童心未泯嘅遊戲，其中有個戴眼鏡嘅OL樣齊陰斯文姐姐。
靠窗嗰邊有個迷你廚房同飯枱，廚房就無機會用㗎喇，不過有兩位姐姐喺度鋪緊膠枱布，一個係耳下外捲中短曲髮，C cup左右，另一個係爽朗露額高馬尾，著得比較密實，anyway以上全部廢話嚟，因為我無興趣識人。
我隨手就喺遊戲機枱上面攞起咗筒Pringles嚟食，衰鬼又幾識買喎，係美版而唔係馬拉版，我都係俾QQ話過先學精。
健：「David…你平時係咁嘅咩？」
我：「我都唔知我平時係點，呢度個個都三唔識七，又唔知會唔會再見，你想點就點㗎啦。」




健：「我而家應該做啲乜會比較好？」
我：「過去幫嗰兩位姐姐鋪枱，一次過溝晒兩件，今晚直落3P，得咗，比較煩係要思考第一下塞入邊個窿。」
健：「認真呀，粉腸！」雖然細聲但有感嘆號。
我：「返去你嘅舒適圈，跟隊五排吧啦。」其實我都唔知自己有乜可以做，差唔多全場最細係我哋，食下玩下咪算，所以我揦住筒薯片邊食邊睇人玩就算。
過咗一陣有人㩒鐘，我知道係QQ嚟到嘞。