為了實現媽媽遺願，我成為了女兒國唐僧: K177

我：「其實我想問妳同班八…姐妹食tea，真係有必要化妝咩，日日喺學校大家都素顏對住㗎啦。」
Q：「好彩我哋學校極度唔建議女仔化妝咋…咁個個女仔都想自己靚啲㗎啦，我咪當陪下Yvonne囉。」
我：「咁另外嗰兩個呢？」
Q：「乜你認為Uranus會化咩？Zilvia識化嘅，不過一般嚟講佢都唔會，佢鍾意做乖乖女。」
我：「人哋清新脫俗一塵不染，唔化重靚過化啦。」
Q：「你想講乜嘢呀！係咪活得唔耐煩？」
每一次阿健睇到我同女神呢啲日常溝通，又會係咁講其他女，佢就會變得好無奈，其實我想嘅咩，整下整下我都就嚟變咗QQ同YY嘅姐妹咁…
Q：「安全起見，我同會長講好咗大約搭三先到，你兩個入去先，幫我望下有無識嘅人，萬一有就通知我…到時再算啦，但無論點我都唔俾得人知…」
我：「香港無咁細嘅，好歹有幾百萬人。」
Q：「望就咁望，個會長我問咗叫Alex，你哋入到去就搵咗人哋報到先，呢度五嚿水，係你哋今晚嘅參加費嚟。」




健：「Queenie…我自己畀返就得㗎喇。」
我：「而家人哋搵到錢，呢啲係員工福利嚟。」
Q：「唔知呀，總之你哋一陣爽手畀錢人哋啦，唔好拆開喺度數嚟數去咁，我唔要肉酸。」
我：「妳真係睇得通透，我正諗住清咗街市找返嚟嘅十蚊廿蚊紙…會長叫Alex都幾悶下，呢個就叫阿Ken…」
健：「喂，唔好提我個英文名得唔得？」天下間十個叫阿健，四個就叫阿Ken，兩個Kent，一個Kenneth…
我：「唓，咁你唔鍾意個名咪自己改，你身份證又無印嘅，我同Queenie就話無得揀啫。」多得啲百厭父母。
健：「臨急臨忙…改乜鬼喎。」
我：「例如…加長佢？叫Kangaroo，等女等到頸都長。」
Q：「屌你，你真係好仆街…Kangaroo係袋鼠嚟呀！長頸嗰隻叫Giraffe！」
健：「原來女神都會講粗口…」




Q：「點呀，係咪大失所望？對住呢條友仙女都要爆粗。」嗯…好難想象如果Zilvia對我爆粗會點。
健：「唔理喇，我叫返健就算，唔想諗嘢。」
我：「妳叫Kuromi…咁我係咪應該叫Keroppi？」
Q：「你，唔，…，好玩嘢，影衰我唔會放過妳。」
我：「咁我叫David啦，呢個名最唔起眼實無人理我。」
Q：「重有…呢度係我個Loewe，唔該幫我袋住先，我唔想張揚。」然後佢就將個手袋放咗喺個膠袋入面塞畀我…
如是者，喺夠鐘之後我哋就上咗新蒲崗嘅一棟工廈，喺一間Party Room嘅門口㩒鐘。