為了實現媽媽遺願，我成為了女兒國唐僧: K179

補充一下QQ今日著乜，一件偽JK嘅藍色連身裙，有水手領但無呔無蝴蝶結嗰啲，長度啱啱好不及膝，下面係白襪仔白鞋，算係比較平實得嚟又得體嘅設定，佢應該計算過適合今日兩個場合先咁揀；但我又心諗，Uranus點會理得妳哋著乜，除咗T恤同運動裝我想象唔到佢可以著乜。
A：「咁多位會員，登登登凳！大家望過嚟睇下！我哋工會嘅第三位主播出現咗喇，啱啱加入我哋大家庭嘅美少女直播主，女神Kuromi！大家畀啲掌聲歡迎佢！」
「啪啪…啪啪啪…嘩，原來真人好靚…係咪可以攞簽名…」
Q：「哎吔，邊係女神喎，我都係打機嗰陣順便播下咋嘛，咁多位朋友，以後請大家多多指教喇。」QQ向眾人微微點頭，佢喺呢度嘅態度同女僕餐廳嗰日真係完全唔同，好似變咗另一個人咁。
A：「另外呢兩位係Kuromi嘅同學兼朋友，David同健仔，你哋慢慢認識下啦，我介紹唔到咁多人呀…」我哋都順勢舉手同其他人say個hi，不過呢種登場方式，彷彿我哋兩個就係女神嘅附屬品。可能比起多餘更高一級，就係直頭嫌我哋阻頭阻勢想立刻消失。
「係呢，Kuromi妳點解直播唔出樣嘅，明明咁靚女！」
Q：「啊，成日打機已經夠我俾人鬧，如果俾屋企人知我直播埋嘅話，就實行聽俾人沒收埋電話都似，咁我又唔係顏值台啲女主播，出唔出樣好閒啫。」QQ真係好犀利，只要輕輕一念就可以改變晒成個態度，甚至乎影響埋身邊嘅人點睇佢，而我亦發現到雖然一樣都係男仔，呢邊沉迷打機嘅同嗰邊沉迷女色嘅係兩種生物嚟。
可能內心一樣咁鹹濕，但出嚟嘅感覺就好唔同。
「妳去顏值區應該可以屌打一大班女主播啦！」
Q：「你哋就唔好講笑啦，我乖女仔嚟，點會做嗰啲嘢喎。」…，我唔知會長會點諗，但作為一個有返小小水平嘅人，識得黑桃王后應該都知道佢唔簡單。




「Kuromi，嚟吖，唔好理佢哋，我哋一齊唱K吖。」
Q：「哦…可以嘅，不過我唔係好識唱㗎咋。」
既然QQ嚟到，我哋兩個傻仔都黐返埋過去先。
「唔緊要啦，妳叫得做Kuromi，我哋應該可以friend到嘅。」兩個女仔一樣高，差唔多樣，唔太識分…
Q：「哈哈，乜會關個名事嘅咩…」
「梗係關事啦！如果妳叫Melody，我哋係一定唔會睬妳囉，哈…我叫做嘉雯，英文名叫Carmen，呢個係我家姐叫嘉瑩，英文名係Karen，多多指教呀。」
聽到Carmen呢個名我個心跳咗一下，然後就繼續跳…無嘅，呢個名其實好普通，正如呢兩姐妹都係好平常嘅學生樣，我望一望阿健，佢都好似好平靜。