thriXt Qantasy 純文字安眠之作 (New: - U2K - 一直上架): K172

K：『你識我？喺嗰邊人嚟？』
某：『唔使緊張，我只不過係個網絡閒人，遊來遊去見到呢兩位主播風格好相似，加埋用同一隻水杯，哈哈。』
K：『哦，無問題嘅，我係兩邊播，無話唔俾得人知。』
某：『妳做呢行，識人都重要，入下大工會無壞吖。』
K：『我明你講乜，但出面有好人亦有壞人，我重讀緊書，唔想煩咁多呢啲嘢。』
某：『妳做性感少女主播，重要搞真人見面會，啲粉絲係乜人其實大家心中有數，唔通咁都重怕煩？』
K：『你可以咁講，但我至少喺嗰邊有話事權，而家你唔知頭唔知路搵我，驚都好正常呀？』
某：『明白，我呢個工會係我同另外兩個中同創立嘅，我哋讀嘅係band 1中學，我諗差極都有個譜掛，而家我同另外一個同學已經升year 2，佢亦係一個主播，另外一個就升IVE HD final year，我可以保證呢度無小學生，無潮童，無黑社會，都係高中或讀緊大專多，重有幾個啱啱出嚟做嘢，如果妳覺得我哋呢啲打開機嘅係重恐怖過嗰啲重課畀妳想同妳食飯嘅怪叔叔，咁我只能表示遺憾。』
K：『比起驚唔驚，我怕煩多啲，你知啲工會經常貴圈XX。』對住街外人，QQ嘅狠話係唔講得笑。
某：『嗱，講真出得嚟玩，溝仔溝女呢啲就實有㗎啦，就算妳讀緊中學都咁話啦係咪，我相信妳有能力保護到自己嘅，所以都叫埋你個朋友仔join，多個照應吖嘛，而且妳都可以放心，我會幫妳保密性感主播呢樣嘢。』




K：『就咁入工會，一齊打下機就可以？』
某：『我哋係一個比較active嘅工會，所以時不時都會搞啲網聚嘅，嚟緊八月三十一號我哋會有個慶祝開學（悼念暑假）party，地點會係喺一個企理嘅party room舉行，妳都知道搞呢啲group，男女平衡係十分之重要，所以如果妳有意加入工會，都希望妳可以到時出嚟一齊玩，妳可以放心我唔會收妳錢嘅，至於妳朋友仔就收佢學生價。』
K：『咁我明你想點，錢唔係最大concern，但我唔會俾人溶咗㗎？唔好同我講得一個女仔喎，我唔想攪到要好似返工咁。』
某：『窈窕淑女，君子好溶…呢啲，sor，係唔存在嘅（至少我課唔起金…），認真邀妳嚟玩，唔會畀壓力妳，嚟打下機，唱下K，食下嘢，係咁簡單，報咗名兼畀埋錢嘅已經有三個女仔，兩個高中，一個讀U，重有三個考慮中，一定唔止妳一個。』
K：『即係我去埋就會吸引到其他女仔嚟？』
某：『希望係啦，哈哈，重有其他男仔嘅。』
K：『但女仔唔係本身免費嘅咩=__=？』
某：『無啦…我幫妳哽，其他我唔知，總之收到錢。』
K：『我諗諗先，都要問埋我朋友嘅意見同schedule。』