thriXt Qantasy 純文字安眠之作 (New: - U2K - 一直上架): K171

我：「唔好啦，我好滿意而家嘅生活…」
Q：「無得你揀呀！你望住我敷mask個樣好奇怪，要一齊陪我，快啲攤喺度。」都唔知女神佢搞乜。
Q：「點呀，係咪好舒服呢？」
我：「都唔錯，涼浸浸咁，好似塊面喺度飲緊汽水。」
Q：「見完Angel姐姐，有無諗通咗啲未？」
我：「諗通啲乜？其實我同佢真係無嘢喎…我都唔知佢攪乜，可能貪玩專登惜我嚟激嬲妳掛。」
Q：「好驚咩，又無叫你解釋，我做乜要因為佢惜你而嬲喎，我諗住你會惜返佢添㗎，不過係嘅，Carmen姐姐一樣惜妳，凡親啲姐姐見到你都係咁。」
我鬼知咩…嚴格嚟講YY都係姐姐嚟，重係變態嗰隻。
我：「唔知…可能因為我個樣睇落好好玩掛。」
Q：「玩！我係問你睇通咗肯認真讀書未呀？人哋捱窮要借錢讀書都咁開心，你啲暑期作業做晒未呀？再唔勤力啲你出年就會好難捱㗎喇，唔好話我唔同你講定先。」




我：「知道，我呢幾日會搞掂埋佢㗎喇。」
暑假嘅日子真係過得好快，快到我以為聖誕節已經喺眼前，而今年亦都係我第一年可以喺開學之前做得晒所有暑期功課，包括嗰啲無鬼謂嘅電子剪報，而且重有幾日剩；正當我以為唔會再有特別嘢發生可以無風無浪迎嚟開學嘅時候，某一日QQ直播完突然同我講。
Q：「阿爽，我有啲嘢想問下你意見。」好少可見佢用一個咁認真嘅態度同我講嘢，所以我都即刻睇下有乜嘢可以幫到佢，然後佢遞咗部電話嚟，係直播平台嘅DM對話框，對方係一個叫某會長嘅人。
某：『Kuromi妳好，睇過兩三次你嘅直播都覺得唔錯，感覺到妳係想認真做落去嘅主播嚟，我都唔轉彎抹角喇，其實我係香港某大傳說工會嘅會長嚟，想邀請妳加入我哋呢個工會，見妳平時有個打野朋友仔會同妳雙排，佢都可以一齊加入嘅。』
睇啲語氣就唔似係毒撚或者粉絲，應該係真打機嘅人。
K：『我諗我未算係一個技術主播，亦無衝工會活動，直播都係同人share下一齊笑下，入工會好似意義唔大。』
某：『妳都係啱啱開播，唔一定要諗有乜意義嘅，至少我哋呢邊都有兩位技術主播，或者將來有合作空間，另外如果想借小號，拍下其他人排嚟拖分，甚至乎可能對某啲限定item或者skin有需要，我哋都應該幫到妳。』
K：『咁我輕鬆同朋友玩下，直播純粹打發下時間。』
某：『妳認真咁諗？黑桃王后。』