為了實現媽媽遺願，我成為了女兒國唐僧: K170

Q：「無唔係，咪話咗朋友都可以拍拖。」
我：「係呀，而且係普通朋友專屬。」
Q：「嗯，你都真係幾受姐姐歡迎，睇嚟食唔少。」
我：「無！無呀…上次打工撞到之後…到啱啱先見返，而且我無佢聯絡方法，想搵佢都搵唔到。」
Q：「咁重難得，幾個月無見，一見面就好似見返個深愛嘅舊情人咁…話晒都夠十六歲，明嘅…明晒！」
我：「無呀！我未夠十六歲，我好乖㗎。」
Q：「係咩，但阿健話你連Bubble師姐都搞得掂喎。」
我：「佢！個死仔包同妳講咗乜…我同Bubble點會…」
Q：「我唔知，佢好隱晦，唔敢同其他人講咁，不過你走唔甩㗎喇，肯定同師姐佢有啲嘢。」
我：「我可以發毒誓掂都無掂過佢對波！」




Q：「唉，一早咪話咗波波已經滿足唔到你，希望師姐佢唔會白蝕俾你啦，其實佢好清純。」
我：「唔好講到我女生焚化爐咁，妳知我好守規矩。」
Q：「我終於明嗰句點解，寧願放棄一樖樹，都要食晒成個森林。」無囉！明明就係掉返轉，咪屈我喎。
我：「傻嘅咩，點會放棄一樖樹喎。」
Q：「係咩，何謂唔放棄一樖樹…？…呀，到喇，我哋揀mask先啦，嘩，咁多師奶嘅，好彩早啲嚟到。」
女人係一種好恐怖嘅生物，可以將男仔排PS5嘅毅力同勇悍應用喺任何一笪地方。QQ最後買咗三百蚊六盒mask，唔算少亦唔可以話好多，雖然我哋使錢嘅方向唔多同，但見到佢生活好咗都感到欣慰嘅。
返到屋企佢就喺度敷mask，生活咗咁耐已經慣晒佢每日喺屋企做啲女人嘢，呢種赤裸裸嘅生活有啲改變咗我對女人嘅認知，相信如果我要觸動一個普通女仔亦會變得越嚟越容易。
Q：「喂，不如你都敷吖，呢個係竹碳排毒mask，可以淨化毛孔，清除油脂，用完會好清爽㗎。」
我：「吓…呢啲嘢好似同我嘅屬性唔太夾喎。」
Q：「咁你想唔想靚仔啲吖？容易啲溝女吖嘛。」




坦白講，我唔係嗰種想不停溝女嘅花花公子嚟，女有乜咁好溝喎，如果要花大量心機嚟令一個女仔動心，咁都好辛苦啫，有啲嘢啱玩就啱玩㗎啦。況且而家…上次韻婷件事已經嚇到我一額冷汗，所以靚唔靚仔無所謂啦，但求唔樣衰就算。
我：「咁我而家又唔係要溝女。」都明知溝唔到…
Q：「啱嘅，你似係等女嚟溝你多啲。」