thriXt Qantasy 純文字安眠之作 (New: - U2K - 一直上架): K153

A：「知道，當然！女王大人，小人先行告退！」
就係咁，呢隻嘢啜埋幾啖嘢飲乖乖咁走咗。
沙：「Ku…妳真係好犀利…」
我：「無嘅，其實個個男仔都差唔多咁嘅款…」
沙：「係呢，我係咪要跟佢哋咁嗌妳…雖然我嘅身份好似仍然係女僕，無乜點變。」
我：「其實…妳點嗌我真係無所謂，只係我Kuromi呢個名重有其他用處，唔想俾佢哋知，或者妳嗌我黑桃妹妹都可以。」
沙：「唔緊要啦，黑桃女王陛下大人，小女沙織都係乖乖做返個女僕，我擔心妳其他騎士勇者英雄會唔高興，反正我哋做呢行，其實同每日做cosplayer差唔多。」
我：「嘻嘻，咁沙織女僕，我哋而家一齊執好啲位先。」
有同事嘅感覺真係好，雖然做嘅都只係最簡單嘅嘢，但總好過平時做直播永遠要一個人面對晒所有事情。
我：「女僕長，請問…呢個喇叭係用藍芽播？」




何：「係呀，呢個年代應該無人會用線駁喇叭，雖然條電線就點都避唔到。」
我：「但係用藍芽會有delay，有機會影響到手感。」
何：「原來係咁…不過sorry，呢度已經無喇叭線…」
我：「嗯，唔緊要，我試下自己諗辦法。」
我：『親愛嘅交叉仔，有偉大嘅任務要交畀你。』
X：『妳唔使整咁多鍚鍚公仔…有嘢就講啦。』
我：『幫我去買條電腦喇叭線，即係兩邊都係耳塞頭嗰種，要有兩米長嘅，唔該晒交叉仔。』
X：『呢度係MK唔係SSP喎…百老滙未必有。』
我：『傻瓜！MK有好多樓上音響鋪，自己去Google map搵下，貴啲都唔緊要，最緊要有。』
X：『但我只係得返半個鐘多啲…』




我：『唔使喊，想俾人惜嘅話就即刻同我仆去買啦，我深信你一定可以幫我解決到問題。』
Set好個場，我彈咗幾下，大概有零點一秒嘅延遲，唔可以話好嚴重，但唔排除會攪到我甩beat，就算無人聽得出我都唔想；好多男仔打機全部配套都係用返有線就係呢個原因，例如玩槍game，如果加加埋埋啲delay有成零點三秒，喺你聽到人聲嘅時候你已經俾對面射死咗。
呢啲嘢係我本身就識，唔係個傻仔話我知嘅。
何：「嘩，妳件衫好爆喎，同我哋啲女僕裝兩個世界。」
我：「嗯，專登為咗今日買，都唔知有無機會再著。」
何：「妳未收山㗎啦，下次event咪…唔通妳每次都諗住著新衫？」始終都係女人先最明白女人諗乜。
我：「如果可以嘅話…次次一樣啲人就覺得無新意。」
何：「睇嚟妳真係想做KOL或者artist喎，咁認真。」