為了實現媽媽遺願，我成為了女兒國唐僧: K154

我：「錯，我唔想做，我只係想搵錢，而家唔係嚟打工我都唔怕同妳講，唔係我屋企有事嘅話我乜都唔想做。」
何：「明嘅，不過妳真係要小心啲男人，要賺佢哋錢就會有風險，雖然做我呢行都無乜資格評論啲乜。」
我：「我會好小心，唔會為咗錢就亂嚟。」
何：「嗱，一陣我留喺廚房煮嘢食㗎咋，乜都唔會理，妳有乜嘢需要就同沙織好好溝通啦，佢應該會幫到妳手…嚟吖，我幫妳綁背帶，呢啲衫一個人著唔到㗎。」
※※※※※
呢個女神正一使人唔使本，好彩我重識跑去旺電買，五十蚊就搞掂，如果去專業影音鋪隨時多個零都唔得，雖然我自己無錢玩，都識得啲敗家同學玩耳機，閒閒地都三四千起，換條線都成千。
不過諗落又好閒，對比返呢幾個女神，亂使錢嘅YY阿哥，養彼拉多嘅內向少女，鍾意LV嘅QQ…
然後我就跟住地址去到女僕餐廳㩒門鐘，叮噹一聲。
沙：「個豬賤沙媽…」聽到就知嚟呢度唔係為咗食嘢。
不過呢個女仔又幾可愛，瘦底斯文中長髮唔多MK味。




我：「欸…唔使咁客氣嘅，我嚟係想聽演奏會，唔係俾女僕服務…」其實我真係有啲怕態度咁主動嘅女仔。
沙：「我知道呀，不過唔緊要啦，都係當平時返工咁咋嘛，主人係最後一位來賓，你一定係X二次方開方先生喇，嚟吖，等沙織帶你去入座呀下。」
就係咁，我俾女僕小姐帶咗去右後方個角落位坐，而其他位都係座無虛席嘅清一色男生…頂，呢度個設計真係一間迷你課室咁，而呢刻嘅感覺係勁似中一開學，一入嚟對住全部唔識嘅人，而且重要係男校！
「咦，好似齊人喇喎，黑桃王后重未出嚟嘅？」
「佢係咪已經喺度㗎？唔好呃我哋喎。」
前排嘅人仔有啲鼓躁，都正常嘅，要同一個平時死都唔出樣嘅直播女見面，的確係會緊張啲嘅。
呢度嘅座位排咗三排，每行五個位二二一設計，我當然係坐單丁位，出面有張類似先生枱咁嘅嘢，上面放咗QQ部keyboard，對我嚟講當然唔會有啲乜期待。
沙：「請各位稍安無躁，我入去睇下主角準備好未。」
「吶…你好呀，想問下你課咗幾多？」隔籬個四眼哥哥撩我講嘢，雖然係佢做主動，但我就完全唔覺得佢係一個外向嘅人，似係大個啲版嘅細龜咁款。
我：「四位數多啲啦，我零用錢唔係多。」




「嗯，我差唔多二千到，但喺排名榜都跌到落廿幾，我以為無得嚟㗎喇，咁你真係好好彩。」
我：「平常心啦，我本住嚟聽下音樂嘅心態，嚟唔到都唔會好傷心嘅，因為真係無得同啲課長鬥。」
「咪係，好想快啲U grad出嚟做嘢，到時就可以想課幾多就幾多，唔使睇人面色。」你爸爸媽媽咁難得供到你讀大學，你都真係夠晒生性呀下，希望你繼續努力。