thriXt Qantasy 純文字安眠之作 (New: - U2K - 一直上架): K152

何：「哎吔，客乜鬼氣吖，妳而家又唔係我嘅員工嚟，唔使叫我做女僕長啦。」
我：「嘻，我只係覺得咁樣嗌最順口啫。」
何：「無見一排，估唔到大個女咗咁多，重越嚟越靚。」
我：「邊係喎，應該都係…同一個樣啫。」
何：「唔同，上次嚟妳重係一個小妹妹嚟，但係妳而家已經好叻女，我喺電話聽到妳話想租我個場嚟做生意，當時我已經嚇咗一跳，只係短短幾個月…」
我：「邊係生意喎，只係搞個event仔，聚餐啫…」
何：「呢啲嘢無分大細，只要係自己諗出嚟，親力親為落手落腳做就係生意，妳實在係好叻女，我喺妳呢個年紀剩係知道自己可以喺快餐店炸薯條。」
我：「多謝女僕長，今日真係要麻煩妳幫我炸薯角，哈哈，重有其他嘅嘢食，我知道…一次過整十幾份餐實好辛苦。」
何：「傻啦，我多謝妳畀生意我做至啱呀！」
我：「係呢，琴日先PayMe妳嗰兩個有無講埋食乜呀。」




何：「有，放心啦，我買定多咗材料喺度，又唔係啲乜特別嘢，就算佢哋一陣見到相之後想轉都重得。」
我：「哈哈，好似飛機餐咁。」
何：「咁我希望好味過飛機餐少少啦，嗱，呢度就係我平時播歌嗰部notebook，妳睇下點set先啦。」
插隻手指落去，裝返個MIDI軟件，然後再駁埋條USB線…
沙：「肥仔佢死都唔飲埋杯嘢，唔肯走住…」沙織又一面頭都大埋咁入嚟廚房，正當何小姐想出去睇下乜事…
我：「女僕長，等我出去處理就得。」
沙：「Anson主人，唔好意思，今日呢度提早閉店，因為一陣有function呀。」沙織姐姐好有禮貌咁同佢講。
A：「咪啱囉，一陣我都有份參加！Kuromi！好耐無見，我一直都好掛住妳個樣呀！」
我：「喂，你咁早就過嚟想點呀？」
A：「重使問嘅，當然係嚟支持沙織姐姐。」




我：「呢條友而家上嚟食嘢嗰陣重有無古古怪怪呀？」
沙：「無嘅…妳唔好咁話佢啦，話晒佢都係主人嚟。」
我：「主乜鬼人！而家女僕餐廳閂咗門㗎喇，佢已經唔再係主人，只係我個乜乜大臣嚟咋！」
A：「係係係，微臣梅花積在此，我而家好乖，對所有女僕都好有禮貌，而且無食剩嘢。」
我：「喂，你啱啱先食到咁飽，一陣重食唔食得落？」
A：「小兒科啦，呢度嘅出品，小人可以食到五個。」
我：「所以咪食到咁大嚿囉，重小人…認真，我有好多嘢要準備，唔該你而家離開先，到七點三先好上返嚟，重有，我已經無做女僕，請唔好嗌我做Kuromi。」