為了實現媽媽遺願，我成為了女兒國唐僧: K115

不過而家嘅QQ已經好咗好多，係佢條仔比較似受害者，但有得扑就乜都抵返啦。
我：「呢啲…其實都唔係秘密嚟，個個都知。」
媽：「咁你會唔會討厭佢㗎？」
我：「呢層…比起鍾意或者討厭，我係相信佢。」
媽：「你相信佢啲乜？」
我：「佢係一個好叻嘅女仔嚟，次次我唔識做功課，問佢就會有答案，所以…妳都可以相信妳個女。」
媽：「即係我要信我個女暑假日日出街唔返屋企都唔會俾男仔呃？」
我：「可能係掉返轉佢出去呃啲男仔，鋸到佢哋一頸血，咁樣會比較容易令我相信。」佢即刻變成無言一字眼。
媽：「你下年係咪同佢同班㗎？」
我：「係呀，咁又點。」




媽：「如果有啲壞男仔埋佢身，你就幫我提點一下佢。」
我：「佢點會聽我枝笛喎，我個樣都唔似正經男仔啦。」
媽：「唔係呀，你唔似係壞人，重幾得意添。」
我：「呀…多謝…」
媽：「係呢，我可唔可以問你攞個電話號碼呀？」
我：「吓，做乜要抄我牌？」認真講…如果我喺第二度識呢個女人唔知佢係QQ媽咪，我真係會比佢抄牌，雖然明知佢大我好多，但望落個樣其實都係得廿六七咁，而且重要好靚有身材，成熟嘅女人…一定喺個方面好正…
媽：「你都明…我個女成日唔聽我電話，如果有乜萬一…至少我可以搵到個同學仔睇下幫唔幫到手。」呢個媽咪，喺搵人笨嘅能耐上面都同佢個死女包一樣。
我：「首先，我同佢只係普通朋友，放咗學佢做啲咩我係唔會知嘅，其次，我唔會出賣朋友，如果auntie妳要搵佢，我最多都係冒住俾佢鬧死嘅風險通知聲佢，其實佢係唔聽電話啫，唔係唔知妳搵佢，咁妳搵我…都係serve返同一個purpose，所以…妳打畀佢咪得。」
媽：「唔係呀，都有用，萬一佢熄機呢…又或者，你唔同佢講都得㗎，我想知佢正唔正常啫。」
我：「妳咁擔心…使唔使搵偵探查自己個女？」




媽：「哎吔，偵探好貴…唔嘅，無謂嘥呢啲錢，睇你個樣都幾醒，而且同班同學重容易接近佢，交呢個任務畀你啦，如果幫到手再請你食嘢。」
我：「吓，又嚟食M記呀…」
媽：「唔會，到時一定好啲。」即係點，茶記？
我：「不如咁，auntie畀妳電話我，如果Queenie到時真係出咗啲乜事，我盡快通知妳，咁樣好唔好？」
媽：「都可以嘅…你畀部電話我入落去啦。」
我遞咗畀佢，佢喺聯絡人度加咗『Queenie媽咪』，然後再輸入咗八粒數字，點知佢㩒多咗兩粒制…