thriXt Qantasy 純文字安眠之作 (New: - U2K - 一直上架): K114

媽：「係…希望啦。」佢個樣心虛到爆炸咁，好好笑。
我：「所以…我諗佢都係貪玩啫，唔使太緊張。」
媽：「你成日喺附近撞到佢嘅？」嗯…呢條問題，係我頭先個樣太親切？太無所謂？我想像唔到其他人見到會點…
我：「又唔會…佢都唔係住呢度，喺附近見親佢都著校服嘅，而家暑假…唔係妳帶佢嚟咩？見佢跑咁快我都嚇咗一跳，估唔到原來係要避開媽咪…」
媽：「原來佢間學校就喺呢度附近…」真係想嗌救命。
我：「吓…頭先撞到佢個位行嚟呢度咪經過囉？」
媽：「我剩係中一開學嗰日同佢搭爹地車送過佢返學咋…爹地送過佢一排，佢就話唔想煩到我哋，畀錢佢搭的士就得，所以無乜嚟過…」
我：「唔使見家長㗎咩…」
媽：「次次我先生揸車入埋學校，所以唔太知出面望入去係點嘅樣…」佢好努力咁維持返一副高產家庭應有樣子。
媽：「呀，整嚿麥樂雞嚟吖。」佢隨手就拎起咗一嚿，重要係最易點醬嘅bone shape，望住呢個傻更更嘅女人食嘢…其實幾可愛，同智商下線嗰陣嘅QQ差唔多樣。




我：「食啲薯條添呀，其實我都未肚餓。」
媽：「唔喇，熱氣。」呢兩母女其實都幾一擔擔。
媽：「Queenie…放暑假前…喺學校正唔正常？」
我：「好正常，都係咁同女仔friend玩，成績都好好。」
媽：「女仔friend係咪即係Zilvia？」
我：「其中一個，不過佢哋唔同班嘅，出年就同班。」
媽：「咁…多唔多男同學纏住佢？」
我：「佢咁靚女…妳唔使問我都應該知道啦。」
媽：「你係咪其中一個？」
我：「做乜要纏住佢喎，但就算係我都唔會講真話啦。」




媽：「你知唔知道…佢有無男朋友？」
我：「咁我又真係無見過佢喺學校拍拖喎，不過我諗如果佢想要男朋友，隨時都可以有啦。」
媽：「嗯，女仔受歡迎…其實真係好麻煩。」
我：「所以由得佢啦，妳都阻唔到佢。」
媽：「咁你會唔會鍾意佢？」
我：「我…為乜要鍾意佢…」
媽：「男仔唔係個個都鍾意坐喺隔籬位嘅靚女㗎咩？」估唔到呢個媽咪都幾in，睇嚟同QQ一樣會睇埋晒啲垃圾網絡小說，不過我就比較大方，唔使靚女都得，如果唔係有QQ喺度，我今個暑假早就日日同韻婷啪啪啪。
我：「Auntie妳睇我個樣就知我襯佢唔起啦…同女神一齊，係一件好麻煩嘅事嚟。」
媽：「我就係想勸你回頭是岸，呢個女嬌生慣養，刁蠻任性唔聽話，公主病好難服侍，係我縱壞咗佢…」妳而家先知妳唔識教女？完全係妳嘅責任嚟囉，但睇妳個樣隨時比佢有過之而無不及。