為了實現媽媽遺願，我成為了女兒國唐僧: K113

佢個樣呆咗一呆，好似勢估唔到我答得咁灑脫而反應唔到；唓，妳識呃男人，我喺條街吹水大，㞗吹都吹到用翻版大陸陀螺換人哋正版，使驚妳。
媽：「嗯，係健康啲嘅，我個女都好鍾意飲zero。」
我：「係咩，我重以為佢唔飲呢啲嘢，聽過佢講喺屋企會飲香檳。」你用資訊試我，我提供更多垃圾畀妳。
媽：「啊…係呀，佢都係偷飲少少嘅啫，咁細個唔應該飲酒，前嗰排我個女喺學校表現點樣呀？」
我：「Auntie，妳咁擔心嘅？係咪佢離家出走唔返屋企？」睇妳點答，點答妳都死。
媽：「無…未至於，不過呢排唔係太聽話，成日出街唔肯講去邊，返到屋企就粒聲唔出，問多兩句就發脾氣。」
我：「乜…唔係個個青春期都係咁㗎咩？如果佢日日準時返屋企黐實妳唔係更加擔心咩？」
媽：「乜你講嘢咁老積㗎…」
我：「可能由細到大喺條街蒲得多咪咁囉。」
媽：「你唔返屋企無人擔心你嘅咩？」




我：「我屋企人其實無乜時間關心我。」
媽：「咁…可能係你媽咪唔想管得你太嚴，驚你唔開心掛。」
我：「我媽咪喺我五歲嘅時候就已經走咗。」
媽：「走…咗？」我專登唔望住佢。
我：「嗯，離開咗呢個世界，去到天上面。」
媽：「阿爽，好…對唔住，sorry。」
我：「唔使，都唔關auntie妳事，不過媽咪好惜我。」
媽：「五歲之前嘅嘢你都可以記得咁清楚？」
我：「唔係，佢到而家都重喺好惜我，重會一直繼續惜我落去。」其實正常人又點會估到我媽咪臨走之前會設計一個咁嘅遊戲…可能由於佢係做教育，而且重係教中文掛，而佢亦估到得幾歲嘅我或者一路長大嘅我會試圖偷偷拆晒啲信嚟睇，所以喺我即拆嗰封零號信入面，佢交待完啲必然而我又睇得明嘅門面嘢之後；佢就同我講每一封信都有對我嘅祝願，而且係用咗佢自己嘅靈魂同天神訂下契約，如果我偷偷哋擅自拆開啲信，媽咪就會被罰由天上面跌咗落地獄；附件係一幅佢畫嘅手繪，上半part係藍天綠草，有間屋，有兔仔，有棵蘋果樹，重有一個著住白色長裙有翼嘅女人，而下半part就係熊熊烈火，有猙獰嘅黑影同藍色嘅怪獸…當然大個咗就會知係媽咪氹我嘅招數，但係我而家會覺得QQ就係幫我守住地獄之門嘅看門人。
諗諗下都想喊，但喺Q媽面前唔可以表露出嚟。




媽：「唔通…妳媽咪留咗一大筆遺產畀你，夠用成世？」
有時真係阿女清楚阿媽，多過阿媽知道自己個女搞乜…
我：「咁又唔係，我屋企好樸素㗎咋。」雖然無乜所謂，但我唔諗住解釋多啲，呢樣嘢QQ知就已經足夠。
我：「不過我諗父母真心惜仔女，我哋係會知嘅，如果妳惜Queenie嘅話，佢一定會感覺到。」