為了實現媽媽遺願，我成為了女兒國唐僧: K89

佢無理我，跟手拖咗我去屋邨啲凳度坐，然後打開封信。唔通係佢老竇搵佢？佢咁小心可能有啲嘢，我都係認真啲唔好再玩，睇下有乜幫到佢。
我：「係…一張收據？」上面印住三千有找，通利logo。
Q：「唔係收據嚟，係提貨單，加咗印未簽收㗎。」
我：「要攞乜貨？妳自己買嘢要咁麻煩嘅咩？」係囉，提貨單咪直接鋪頭攞，如果網上商店邊有呢啲嘢…
Q：「係keyboard呀，有個fans送…又唔可以話送，總之係佢幫我買，而我唔想暴露身份，就係咁。」
我：「吓，妳又搵到水魚呀？成三千都唔嘢少㗎喎。」佢條仔，瘟神iWatch，傻仔健啲skin，我又有份夾下，而家重有fans添，睇嚟作為一個女神每年收萬零兩萬禮物係基本嘢嚟，我連遞form申請嘅資格都無。
Q：「係咁嘅，我直播嗰陣話過想upgrade個keyboard，呢個無位放諗住賣返出去，如果有觀眾對我用過嘅keyboard有興趣就可以優先購買…」
我：「嘩，妳唔驚佢哋用條J敲啲key嚟打飛機呀？」
Q：「是但啦…你夠成日打我飛機啦，我有無無咗忽肉先，分分鐘我每日俾人射屏都唔出奇啦，佢哋開心就好，唔好影響到我就得。」好一個明白事理嘅商務女生…
我：「咁恭喜妳，又慳返一筆，恭喜埋我至啱。」




本身就諗住收個大約一千蚊多啲嘅畀佢，而家我至少慳返成千蚊，話晒呢個都係新貨嚟喎。
Q：「又唔可以咁講嘅，條友好有性格㗎，得閒就會上嚟聽歌，對流行曲無乜反應，有時我心血來潮彈classic或者oldies佢就會開埋歌名話我彈得好，佢一蚊都無打賞過畀我，話呢啲平台好呃錢唔想助長歪風，又話知我收得返嘅係一半都無，係都用其他方法打賞我…總之佢要咗我部舊keyboard，然後叫我畀個model佢幫我買就得。」
我：「咁呢一部係最好嘅選擇？三千都算平喎…」
Q：「唔係咁計㗎！鬼唔知越貴越好咩…條友都好似識音樂，問我使唔使upgrade埋做workstation，要成七千蚊，但係好重㗎，又好大部，你屋企邊有咁多位喎，我搬唔郁又操作唔到，啲功能又用唔晒…算啦。」
我：「咁又係，部部一樣嘅啫，只要妳有技術。」
Q：「唔可以咁講㗎，因為手感好唔同…講你都唔識㗎喇，行去奧海城攞貨先啦。」
拖拖手行去奧海城入埋通利，我諗周圍所有人都會以為我哋係情侶，而實情我就只係嚟搬貨嘅阿四。