thriXt Qantasy 純文字安眠之作 (New: - U2K - 一直上架): K90

我：「妳使唔使做特務咁呀，呢度又唔係得妳一個。」
Q：「佢知道我對波幾大，容乜易認喎。」佢係咪借啲意話自己大波？但的確在場嘅文青女仔都係比較瘦底得佢一個咁凸…同埋，唔怪之得佢著長褲出嚟啦。
我：「人哋又唔知妳幾時攞貨，唔通每日十幾個鐘喺度捕妳咩…」見得嗰一面，如果話捉到有得上床就差唔多。
Q：「咁攞貨最多都係呢兩三日，總怕有心人。」
我：「有無人咁無聊呀，呢啲精神攞去溝女食埋添喇。」
Q：「你認為鍾意睇直播嘅人有幾唔無聊？」
我：「之但係，妳都未見過人哋噃，點知佢有無喺度捕你，可能嗰邊彈緊琴個中學生男仔就係送畀妳嗰個。」
Q：「唔會啦，睇神情都知，同埋我大概知佢幾大。」
我：「嘩，原來妳同人哋已經認識得咁深入。」
Q：「你認為可以隨隨便便幫人買件成三千蚊嘅嘢嘅人會唔會係一個中學生呀？諗下都知啦…」




我：「乜喎，其實中學生…」我好想講奧丁同公主男朋友嘅故事，不過我當然應該乜都唔知，妳嗰條蛋散瘟神咪又係差唔多，個個都為女亡咁款。
確認安全之後，QQ遞咗張提貨單畀個女sales，佢收到之後就對住上面個barcode scan一scan。
「陶小姐，妳好呀，妳件Acturia八十八制keyboard已經到咗貨，不過要麻煩妳喺度等一等，我要搵個同事去倉攞。」根住位姐姐仔就打電話。
根據我推測，一定係負責執貨位男同事去咗吞泡。
我：「妳好呀，陶小姐，請問有乜可以幫到妳呢？」
我唔嗌出嚟喇，反正你哋都知我狠狠咁俾人踩咗一腳。
我：「人哋話波大無腦啫，估唔到重係心胸狹窄。」認真，我同佢friend嘅程度已經超越咗啲兄弟，講淫嘢絕對唔使避忌…當然佢就唔係無腦，而心胸呢方面呢…
Q：「你試下再講，我format你harddisk等你以後唔使打飛機。」唓，好叻咩，唔打咪唔打，我推冧妳就係。
我：「但…點解妳會係陶小姐嘅？」
Q：「我諗因為係黑『桃』王后掛…」




由於要等人攞貨，所以我哋就喺度行下睇下。
Q：「咦，原來呢度有display喎，嗱，呢部就係keyboard，而呢部就係workstation，係咪好大分別呢？」佢指住兩部…對我嚟講都係琴，即係piano嘅東西…
Sharp醒嘅亮白色機身，爽朗又有啲cyber嘅方角設計，係幾靚嘅…雖然我對音樂一竅不通，但我作為一個男仔，對啲有好多制而且要插線嘅電子嘢係帶著愛，所以就算自己用唔著都會覺得靚，而且重點係QQ會彈畀我聽。