為了實現媽媽遺願，我成為了女兒國唐僧: K49

嘩，死港女！妳果然係當全世界男人都係妳嘅工具。
我：「Queenie呀，其實我都識打傳說㗎。」
Q：「死開啦！你都唔識打野，帶唔到節奏又無睇頭，成日想做射手搶人頭，傳說牌都無個，無商業價值呀！」
明明妳就唔係咁迷打機，但所講嘅嘢全部一針見血，我嘅體溫亦瞬間驟降，今次涼涼了。
Q：「你可以放心，我唔會要你白做嘅，如果有人睇…營收都唔錯嘅話，我每個鐘最少可以分返廿蚊畀你。」
健：「但係…我覺得自己未去到呢個水平喎。」
我：「你唔係應該質疑下呢個港女請你做嘢連最低工資都畀唔起咩，小心搵工騙局好喎…」
健：「咁都係打下機啫，又唔辛苦嘅…」
咁你都講得出嘅？你知唔知啲職業電競選手搵幾多錢…
Q：「咪嘈呀你，又無貢獻，如果可以我想安你去對面隊放水送人頭就差唔多。」嗚，右女神妳當我係乜…




我：「喂，咪住先，我夠鐘走喇…重想返去沖個身…」
健：「係喎，咁我哋快啲埋單先，返工唔可以遲到…」
Q：「唔使，你自己快啲趕去開工，我哋繼續謦正經嘢。」然而我轆大雙眼望住佢…心口條乳溝仔，重有肚臍，女神妳諗清楚未…要同佢獨處？
Q：「做乜眼甘甘望住我，驚你好朋友食咗我呀？」
我：「唔係，佢邊敢喎。」
Q：「咁你係驚我食咗佢？」
我：「我驚妳食埋佢嗰份，剝削勞工，連棚骨都無剩。」
Q：「為女死為女亡係男人嘅天職，過嚟幫我打機當練習下，係咪就算無錢收都唔會投訴？」
健：「唔會嘅…淨係打機，我盡力啦。」
Q：「聽到未？請問呢度重有無你嘅事情呢？」




我：「無囉…咁呢餐啲飯錢…」
Q：「唔使呀，我請你食，快啲去開工賺錢養我。」
屌，呢個港女惡得佢吖，乜嘢請我食飯喎，明明我重畀緊家用佢；不過都好嘅，我走咗就唔使攪到阿健好似局外人咁，可以強迫佢同女仔溝通下…但佢望到QQ個心口，有乜可能唔俾佢食住，話晒都係曾經深愛過嘅Kuromi。
我望咗一望龍翔道啲巴士，大部份長途車都無撚用嘅，於是我跑咗五分鐘去樂富…而我終於明點解間茶記可以唔使執…之後返工嘅嘢就，又係咁啦！除咗我係咁諗住好驚阿健會再次愛上QQ，就算佢唔敢同我爭，都唔想兩兄弟第時面阻阻。
屌，佢係同QQ男朋友爭啫，QQ又唔係我嘅。
放工回到家的我：「點呀，請唔請到廉價勞工？」