為了實現媽媽遺願，我成為了女兒國唐僧: K48

我哋叫咗常餐牛扒公仔麪，沙嗲牛炒河同埋咖喱雞髀飯，叫做乜都試過下咁啦；食物嚟到，可以話只係為求有嘢落肚，份量唔多，價錢唔平，味道呢啲就心照啦，我想像唔到有乜原因唔食我樓下街市啲燒臘飯而要嚟呢度食，就算便利店飯都隨時贏佢兩個馬位，至少平啲同質素穩定。
Q：「哈，好彩行完山好肚餓，啲味覺無咁敏感。」
健：「妳話要試伏㗎咋…唔好怪我。」
Q：「唔緊要啦，當體驗一下貧苦大眾嘅平民生活。」
我：「哦，乜家下妳唔係平民嚟咩？」
Q：「嘻…其實你平時煮啲嘢又幾好味嘅。」
我：「吓，你用呢度啲嘢同我煮嗰啲相提並論？唔好咁啦…」
Q：「你唔好讕醒呀，你自己咪又係業餘，你會自己煮雞髀咩？咪又係去超市或者燒臘鋪買。」
我：「咁…方便吖嘛，同埋都好食過佢啦。」
坦白講，要我由零煮冰鮮或急凍雞髀都頭痛，比較容易嘅方法係直接攞去BBQ再落蜜糖同燒烤醬，yeah！但我相信，只要肯研究同練習下，整個滷水或豉油雞髀都一定會好過呢度囉。




健：「睇嚟你兩個都過得幾幸福。」
Q：「咪亂講嘢呀，食你嘅飯啦。」
正所謂好又一餐，唔好又一餐，最緊要唔使捱餓；但我要強調一下，行山肯定係要用錢嘅！今日兩餐加豆腐花加埋車錢已經差唔多百五，雖則係我今朝懶得自己煮…
間餐廳咁嘅人煙，自然唔會有人趕我哋走，我就喺度慢條斯理咁繼續完成呢杯無乜味嘅凍奶茶小甜。
Q：「阿健呀，你有無睇開傳說啲打機直播㗎？」
女神，妳做乜話風轉得咁快嘅？唔通又想呃skin？如果我係健仔就會大大聲聲叫妳收皮！收皮膚啦…
健：「以前有囉，唔睇啲大神打又點會進步喎，不過考試呢一兩個月都無乜睇，玩都少啦…攞一次傳說就夠。」
Q：「想問下，你知唔知道佢哋用乜做直播㗎？」
吓，QQ妳唔係諗住俾呢個癡漢知道呀，J死妳喎…
健：「打機直播…要用電腦喎，有人喺電腦裝模擬器直接玩，通常就將手機個mon port落去電腦畫面，另外要加個webcam影自己，最後用個直播software將啲畫面拉埋一齊，重可以加圖加字加走馬燈…做乜呀，妳想入行？」




Q：「我一直都有直播，但唔係打機直播。」
QQ妳做乜答得咁直接，係咪想拉客…
健：「吓，估唔到喎…妳播落去遲早實有熟人睇到。」
Q：「係，所以你可以放心，我無出樣…但我警告你呀，唔準上網摷我出嚟，唔準睇，亦都唔準同人講。」
健：「我邊敢喎…」
我：「唔好望住我，我都無睇，亦唔會課金畀佢。」
Q：「唓，你有得現場睇梗係咁講㗎…阿健呀，我想問下你，如果我真係做傳說嘅打機直播，你會唔會有興趣幫我一齊帶分，我驚自己一個打會輸得好慘。」