thriXt Qantasy 純文字安眠之作 (New: - U2K - 一直上架): K47

我：「做乜呀，怕黑呀？我唔驚㗎喎。」
Q：「吖，你係咪唔記得你要返工，落返九龍安全啲。」
唔講都唔記得，好彩QQ提我，如果唔係遲到都似。
又原來，阿健入黑後速度真係會減半，睇嚟佢好唔慣黑鼆鼆，反而QQ就無乜分別，一路落去都係石級樓梯無乜難度，面向九龍呢邊亦有好多光害，我哋行得快啲QQ又偷偷地拖我隻手，可能咁樣安全啲掛。
落完山係一笪叫獅子山公園嘅地方，有人喺度燒嘢食。
我：「呀，原來我嚟過呢度㗎。」
Q：「嗯，學校旅行？好似近咗啲喎。」
我：「唔係呀，以前中秋喺球場同啲哥哥打波，佢哋打完上嚟燒嘢食，我得閒得滯咪跟上嚟黐餐，呢度玩火都方便吖嘛。」
Q：「其實你自己一個人嘅生活都幾精彩吖。」
我：「係呀…俾我阿婆催我返屋企嗰陣重精彩。」




Q：「你夜晚成日唔返屋企咪擔心死佢哋囉？」
我：「中學之後佢哋都知我無得救，同埋可能因為我係男仔掛，我肯打個電話返去報位置佢哋就算。」
Q：「你咁鬼死曳早就唔應該理你啦。」
我：「咁其實我喺屋企都係我有我打機，婆婆睇電視同聽收音機，我喺唔喺度都無乜分別啫…」
健：「呼呼…你兩個死人頭真係唔等我㗎喎…」
Q：「你話邊個死人頭呀？！」
健：「Sorry，對唔住…一時口快快講錯…」
Q：「講下笑咋，你咁驚女仔，遲早實俾女玩死都似。」
健：「咁有得俾女玩，都OK嘅，總好過無。」
Q：「到時你唔好喊呀，食唔食埋嘢先返去呀，呢條友煮唔切飯㗎喇。」




我：「唔係呀化，行完山咁攰重諗住叫我煮飯…」
健：「食埋先囉，今晚我屋企人都出街食。」
嚟到天馬苑呀，今晚食乜好呀？死火，連三個選擇都無，大記無，M記無，得一間酒樓中菜館同一間茶記，而且望到門面就知絕對唔吸引，只係叫「起碼」有嘢食。
其實一早知天馬苑係九龍與世隔絕嘅屋苑嚟，但都唔使咁呀，住呢度同住西伯利亞有乜分別？不如晚晚行幾步路上去燒嘢食算，如果唔怕熱氣死嘅話。
健：「女神…呢度…唔知妳O唔OK呢？」
Q：「我想試下伏，佢存在得喺度實有佢嘅理由，話晒叫做一場嚟到，如果唔係都唔會有機會嚟呢度食。」
我：「妳話無問題就得啦，我對食呢啲好求祈嘅啫。」
呢間餐廳存在得喺度嘅理由，咪就係呢度唔就腳，要行去樂富食嘢起碼要十分鐘，而附近嘅竹園同橫頭磡都唔係有乜好食嘅地方；天馬苑話晒都有好幾棟樓，應該住咗唔少人，星期日夜晚八點到竟然得返五六枱客，重要明顯地有另外一枱都係啱啱行完山落嚟。