為了實現媽媽遺願，我成為了女兒國唐僧: K22

欣賞完一陣，過咗半池之後我決定發力，最後我同佢一齊掂邊，而佢游完五十之後就停低，我喺水底望咗兩嘢之後亦都趌返個頭上嚟。佢…好似真係幾正，明明件泳衣咁緊，個波shape都係唔錯，腰，屁股，大髀同腳亦配合得好，就算無亮點都應該係一個標準嘅美女嚟。
點知佢打側個頭望返住我，乜我…真係昅得咁明顯咩？
大卡車教過我，如果有女仔望住你，你迴避返佢嘅眼神咁你就輸咗，人哋會覺得你認衰，你亦都永遠食唔住佢。當然我喺屋企就成日會怕咗QQ凌厲嘅眼神，不過女神係另計嘅，三唔識七我未驚過，夠擔咪兜巴車我囉。
呢個姐姐亦都唔係善男信女，佢見我無避開就將塊面越擰越過…直至到對望先停低。比較得意嘅係我哋兩個都戴咗反光嘅沒鏡，所以其實係睇唔到隻眼。
姐：「望乜嘢望，未見過靚女呀？」妖，咁MK嘅。
我：「你唔望我又點知我望妳呀？」我以MK反擊。
姐：「唔係你望我先我又點會得閒望你呀？」
我：「有靚女咪望囉，唔係嚟游水做乜呀？唔抵得人望就匿喺屋企唔好嚟游水啦。」唔知點解，頂下嘴又幾順口。
姐：「靚仔你都幾串㗎喎，咁嘅樣都知我靚女？」
我：「你望下成個場就知，呢度一定係妳最靚女…而且妳第一句咪認咗妳係靚女嚟囉，唔通妳講大話？」




姐：「我心情唔多好，唔好煩住我得唔得？」佢除咗副沒鏡望住我，個神情幾踏實下唔似係奇珍異獸，亦都眉清目秀，但游水look嘅話就絕對稱唔上女神嘞。
我：「邊有煩妳喎，係妳撩我先嘅，不過我而家可以肯定姐姐妳無講大話，真係靚女嚟。」
姐：「哈，你肯定你細過我？」我高佢啲咁多啦…
於是我都除埋沒鏡，對住佢微笑，用個有啲kai嘅樣嚟望住佢…雖然我生得唔係出類拔萃，但既然兩個女神都話我有啲得意，我諗女仔應該唔會太抗拒？
我：「我擺到明就係小朋友嚟啦，姐姐。」
姐：「妳今年中幾呀…」佢一副無眼睇咁嘅樣。
我：「升中四咋，重係好嫩口。」我齜起棚牙。
姐：「咁細個就咁不知所謂，大個咗重得了嘅？」
我：「姐姐，話唔定我而家已經重得了嘅，妳點知呢？」
姐：「睇嚟…你係全心嚟flirt我咁喇喎。」




我：「邊有啲咁嘅事，我只係嚟讚嘆妳嘅美貌。」
姐：「咪玩啦，快啲答姐姐，做乜嚟flirt我？」
我：「因為…我驚…難道沒練習太耐，感覺都追不回來…」
姐：「夠喇下，我唔係你用嚟練習flirt女嘅對像。」
我：「明明就係妳撩我先嘅，重好意思話我。」
姐：「屈返我添呀？細路你唔好走呀，你咁鍾意玩今晚就好好服侍我啦。」
我：「姐姐妳嚟真㗎…咁樣我係…會驚㗎喎。」