為了實現媽媽遺願，我成為了女兒國唐僧: K23

姐：「昅我昅得咁開心，信唔信我要你精盡人亡返唔到屋企吖嗱，我想同你講你撩錯人，我唔係好女仔嚟。」
我：「靚靚姐姐，對唔住，妳原諒我啦，我知錯，其實…我有女朋友㗎喇。」唔知發乜神經惹到個咁辣嘅姐姐，再玩落去實出事，我唯有認衰知難而退。
姐：「你個打靶仔真係嚟撩架打㗎喎！」
我：「姐姐，我個friend出返嚟喇，bye…」
講完我就即刻喺水底彈走咗…唉，明明…如果唔係有QQ我重唔橫衝直撞咩，雖然我係有啲驚，但睇落個姐姐最甘都係搵黑社會打我一餐啫，唔會賣我去柬埔寨掛？
健：「游埋最後一k就走人咯。」
唉，條友硬掘掘咁，點死衝都溝唔到女㗎啦…知唔知道女仔最唔鍾意就係無癮，不過同佢講嚟都嘥氣。
最後一k，又係半個鐘走右，游完就上水；臨入更衣室前見到姐姐重未走，佢有望一望我，我就擰轉面畀咗個飛吻佢；其實我知自己一啲都唔型，應該重幾柒下，但呢個世界有樣嘢叫柒到盡頭便是型…只要我唔尷尬，尷尬嘅就係人哋，呵呵。
沖完涼，換衫，出返去，散晒。
我：「本來可以飽足全日，而家空返晒，最衰都係你。」




健：「我都好肚餓，去附近商場睇下有乜食咯。」
好彩係屋邨商場嚟都有啲平嘢食，兜咗個圈見到有間泰式茶餐廳下午茶做到六點正，我哋唔理三七廿一就衝咗入去點菜，我要咗個紅咖喱雞扒飯，佢就要咗個青咖喱牛肉飯；無錯，茶記就茶記啦，加啲色就以為真係扮到泰菜咩，至於好唔好食都唔係太重要，因為已經太肚餓，加埋只係四十蚊就是鬼爛但啦。
我：「重攰過打比賽嗰日…」我啜一大啖凍朱古力講。
健：「做下運動唔係幾好咩？」
我：「好，但你唔好諗住咁樣死操一日會有乜效果囉。」
健：「我梗係知啦，不過你已經黑咗好多。」
我：「你自己咪又係…不過你做乜好似好開心咁？」
健：「女神叫我曬黑啲，結果真係話咁快就黑咗。」
我：「佢吹水亂噏㗎咋，佢個樣都唔似係鍾意呢type…」
健：「不過我諗佢唔會跣我嘅，有啲改變都好吖。」




我：「真係唔明你，明明以前俾佢攪到咁唔開心，做乜而家人哋講兩句又好似嗒晒糖咁。」
健：「算啦，過咗去，同埋傷我心嗰個係Kuromi，學校嗰個Queenie係真女神嚟，講嘢點都有參考價值。」
講真我無眼睇佢，佢感覺良好就得，我做下運動OK嘅。
健：「係呢…佢話細蚊嚟搵佢溫書，到底係乜事？」
我：「細蚊大考炒到一仆一轆，嚟搵我求救，咪咁。」