為了實現媽媽遺願，我成為了女兒國唐僧: K15

入到禮堂，理論上係要跟班號坐嘅；不過地下秩序大家都明，班主任亦無勇氣去干涉我哋，所以自自然然就坐咗喺阿健同阿康隔籬，傻仔健個樣眼光光好似飲咗豬肉湯咁。
結業禮有啲乜大家都知㗎啦係咪？校長講下廢話，副校長講下今年啲學生喺出面攞咗乜奬，學生會會長又例牌感謝下啲老師，之後就係頒獎畀各位同學，包括每級嘅頭三名…呢啲當然唔關我事，就連女神佢哋都無份；最後就係訓導輔導兩個主任叫我哋好好利用暑假嘅空餘時間，唔好荒廢學習，參加一啲有益身心嘅活動，重要帶眼識人千祈唔好學壞，同埋收結嘅準時交暑期功課…
嘩！世界好美好呀！好到以為所有女神都會愛上我咁，嗱，QQ唔好爭，妳一定係最大嘅。…，其實我今年好似過得唔錯？重有Wendy…可惜吖。唉，人嘅本性始終係想墮落，好想攪好多女仔，唔想做暑期功課。
就係咁，每年嘅人生都要重複浪費呢兩粒幾鐘先可以迎接暑假；唯一嘅意義係發現到原來紅社嘅財政同文書姐姐係學霸嚟，分別考第二第三，唔怪之得瘟神話唔敢掂佢兩個，真係好黐線。但如果制服到呢啲女仔實好正，一定會好有成功感。
健：「喂，食唔食飯呀？」我終於喺白日夢之中醒咗。
我：「唔食飯，食麪囉。」我連早餐都無食，又有乜可能唔食飯，呢啲生理需求唔到我揀，所以搞下爛gag。
我：「咦，唔見咗阿康嘅？」
健：「佢話搵下啲出年同班嘅熟人喎…」
我：「嗯，明嘅…但係我又要繼續對住你。」
健：「唔覺喎，你剩係對住女神嘅啫。」




我：「邊輪到我對吖，下年有四個女神一齊。」
健：「嗯，咁去食麪先啦。」
係咪好廢嘅對話呢？無錯，呢啲就係真實學生對放暑假嘅心情，頹廢，懶散，沉淪，智商下線先係放暑假嘅藝術。
而我哋就去咗之前同QQ去過嗰間雲吞麪度食。
健：「嘩，你餓過飢呀，定發咗達？」我嗌咗一個牛腩撈粗同埋水餃撈幼，可能連個老闆娘都以為我發神經，所以鋪咗好多菜芯喺上邊。
我：「無呀，慶祝下放暑假啫。」講真，想慶祝嘅嘢有好多，但又好似無乜嘢值得慶祝。
慶祝加咗人工，但我唔好意思同QQ講；慶祝成績有進步，但代表我下年要對住好多學霸；慶祝韻婷鍾意我，但我無機會同佢一齊；慶祝同細蚊重修舊好，但我而家好擔心佢…我諗最實在嘅嘢始終係有得同QQ一齊生活。
健：「唔經唔覺又一個學年，咁快就放暑假。」
我：「返學嗰陣好想快啲放假，當嚟到又有啲唔知點。」
健：「係呢…你無嘢諗住問我？」




妖，佢講嗰件事…經過呢幾日，我已經覺得雞毛蒜皮。
我：「咁你話得任務完成，我咪信你囉，至於你哋exactly做咗啲乜，玩到去乜level，我覺得唔重要吖，定係…你已經同佢扑埋嘢呀？如果係我就想瞭解下。」