為了實現媽媽遺願，我成為了女兒國唐僧: K14

我：「嗯，係一個曳嘅富家女。」
Q：「邊係，點都曳唔過你呢個壞蛋。」
我：「結果妳咪又係幫而家男朋友衰十一。」
Q：「咁…佢誠懇啲吖嘛，我覺得…做唔係問題，但係你唔可以當我咁cheap囉。」
我：「可以點誠懇啲，係咪要填form遞表申請？介唔介意話我知邊度有申請表攞。」
Q：「無呀！咁我男朋友對我都算係幾好嘅，起碼唔會夾硬嚟，我話唔好佢會聽我話咁囉。」
我：「其實計落…我同妳EX差唔多，只不過細蚊係真醉，唔似得妳扮醉。」
Q：「你都知你係壞蛋嚟喱，重有，你唔係有錢嘅靚仔，只係一個無所事事嘅屋邨仔。」
我：「唉，連做渣男嘅資格都無…我諗你EX一定覺得食唔到妳係佢一生嘅遺憾嚟。」
Q：「唔知佢嘞，之後我撞過佢一次，拖住個靚女學生妹喺度溜冰，我望住佢奸笑，佢好似驚我過去岔禍佢咁，點都好啦，咪攪到我遺憾就得。」




我：「妳都係曳學生妹嚟，渣男溝妳都肯受。」
Q：「係呀，我最曳好未？如果唔係邊敢同你住埋一齊。」其實，我最鍾意就係曳曳學生妹…
講下講下，我哋兩個就會自然瞓著，相處咗大半年時間我同佢成日都有機會謦欬，可以無乜底線咁溝通，互相瞭解得越嚟越多，身體亦越嚟越接近…只不過，係一啲都無增加過我同佢發生感情關係嘅希望，可能肉體關係重會易啲添…
第二朝QQ叫醒咗我就出門口，我亦都跟住返去。
首先要去form 5嗰層搵瘟神，佢叫咗我去搵佢先。
瘟：「阿爽…好抱歉，我請示咗社嘅負責老師，佢話如果你嘅功績都要畀小功嘅話，咁佢起碼要出多十個八個畀其他人先公平，但一定會爆晒quota所以係無可能…我盡力為你爭取，有優點一個。」
我：「…，你係咪想同我講，而家我無燒鵝食，得鵪鶉？」我用未瞓醒嘅一字眼向佢放出死光。
瘟：「你…都可以咁理解嘅，出年繼續努力啦，我會盡量幫你安排，如果重係我揸莊嘅話。」
我：「是但啦！橫掂我都唔知呢啲係乜嚟，嗱，成績表喺度。」社際足球最後先搞所以要後補加簽優點。
瘟：「咦，你啲成績又唔太差喎，全科合格添。」




我：「喂，我係攞畀你加簽，唔係用嚟八我考成點。」
瘟：「哈…繼續畀心機啦，一陣還返畀你。」
然後我就返自己課室點名，夠鐘就成班柴娃娃行去禮堂坐。我同韻婷對望咗一下互相點頭，無乜特別嘅感覺，佢亦都好平常，至少我唔會覺得尷尬。