為了實現媽媽遺願，我成為了女兒國唐僧: 995

Q：「同埋，妳諗住搵個男人養妳就可以解決到問題，但男人都想揀個最好嘅女人㗎，妳覺得佢哋會唔會想身邊個女人乜都唔識，剩係識倚賴佢哋吖？」
蚊：「我都明…但我又做到幾多吖…好似我呢啲女仔，隨時想賣身都無人要。」
Q：「唔好咁諗呀，返唔到轉頭㗎。」
蚊：「對妳嚟講，可能唔到無屋企返都唔會賣身，但呢樣嘢…其實喺我哋間學校隨時會出現喺自己身邊。」
我：「乜情況…真係去到咁嚴重咩？」
蚊：「呢啲嘢你問Carmen重好啦，高form嗰邊先係重災區，我估每班都有兩三個，我哋低form呢啲未夠秤，邊有咁多客敢犯法喎，俾仔呃就有。」係咪指桑罵槐？
Q：「雖然…我唔想企喺道德高地去評論呢樣嘢，呢個世代明買明賣係好普遍，但係係咪真係解決到根本問題先？賣幾年就可以退休？妳又可以賣得幾多年喎…到妳失業嘅時候就會發現自己乜都唔識。」
我：「話時話…而家個市做緊乜嘢價？」
蚊：「聽聞…大約好似Queenie一半咁正嗰啲，已經去到一次三千，如果過夜可能六七千以上。」
Q：「一千三千，當一個月五十次，就有十五萬，一年就一球八，夠晒畀首期，五年可能真係退到休，不過去邊度搵咁多客喎…」我好佩服佢可以咁商業角度睇呢件事…




蚊：「都好似有個師姐俾daddy包月四萬一個月。」
Q：「兩個月乜都厭啦，出得起咁嘅錢點會唔想係咁換新玩具喎，計落做情婦好似重穩定啲。」
我：「話時話，有無啲平價手作仔嘅服務plan…」
Q：「喂！咪喺度扮熟搭嗲喎！阻住我哋喺度girl’s talk！快啲去返你嘅工呀！」唓，當我係乜喎，奴隸咩…
不過都真係夠鐘，所以我就咋咋聲落咗去。
QQ…鬼火咁正，點會生存唔到吖，睇佢直播唔露樣都可以有人課金就知幾離譜。如果我好有好有錢嘅話，係咪就買得起佢？但如果咁樣，佢應該唔會鍾意我，剩係鍾意我啲錢，就好似佢媽咪對佢爹地咁…而且我重係一個窮光蛋，根本就無辦法滿足到佢嘅需要。如果，如果，一次就夠，可以同佢真心相愛一次已經好夠，我唔會用錢買佢，只會無條件咁養佢…
一路遙望QQ，一路擔心細蚊，返工嘅時間話咁快就過去…
我：「咦…細蚊妳重喺度？」
蚊：「係呀！都無人搵過我，唔想返去呀！」
望落佢個樣又唔似唔開心，應該係想同老竇鬥氣。