為了實現媽媽遺願，我成為了女兒國唐僧: 994

Q：「唔使對唔住，佢哋亂嚟佢哋嘅事，唔好攪到我就得。」
蚊：「不過就咁睇落妳而家都過得好哋哋。」
Q：「唔係點呀，唔通過得唔好就走去死咗去呀？自己嘅問題就應該自己解決，唔試過晒啲辦法就唔應該放棄，啲大人攪到一鑊泡就佢哋負責返，幫唔到我唔緊要，但我會做返自己啲份內事，無咗佢哋我唔會死。」
蚊：「妳真係好堅強…」
我：「唔知邊個被迫同舅父住嗰陣精神崩潰咁滯呢？」
Q：「喂呀！咁都係…我勇敢咁問你，先解決到問題。」
我：「唔使勇敢喎，有女仔有難，我無理由唔幫嘅。」
Q：「唔係問你勇敢囉，而係諗落同你一齊住要好勇敢。」
蚊：「係呀係呀，好危險㗎，我第一次迷迷糊糊跟咗佢上嚟，結果就…」喂，唔好講到我迷姦咁好唔好。
Q：「咪係囉，不過…如果只係蝕底俾個無關痛癢嘅男仔，就確保可以解決到我嘅居住問題，都重接受到嘅。」




蚊：「吓！妳講真㗎？」
Q：「皮肉嘅嘢，身外物嚟啫，唔好精神折磨我就得。」
我：「無囉好唔好，我屋企係寒酸啲啫，我一直盡心盡力為妳服務㗎！」當然，我心中嘅回報亦係豐盛嘅。
Q：「咁我又無話你唔好…」
蚊：「所以我都想有人解決我嘅問題，我知自己讀書唔叻，點讀都唔會有啲乜作為，大個咗都係做唔到啲乜，如果搵到個正正常常嘅男人要我肯養我就好，咁我就唔使再辛苦讀書。」
Q：「細蚊，唔可以咁諗㗎，男人係世上最信唔過嘅生物嚟。」好喇喎，一時一樣，再咁落去我重有地位嘅？
蚊：「但我亦都信唔過自己，好似讀極都一坺嘢。」
Q：「但係自己先至係最值得信嘅人嚟，妳唔係要信自己溫下書就會變叻，而係要信自己係對妳最好，會為咗妳去努力，為妳著想嘅人。」
蚊：「我有呀，我就係諗讀極都係差唔多，可能係唔合格同合格多啲嘅分別，就算好彩俾我DSE攞到十分八分都無得讀落去㗎啦，咁同攞兩三分有乜分別喎。」
Q：「梗係有啦，個分數唔係剩係攞嚟入大學咁簡單㗎，多幾科合格搵工都易啲吖，妳諗下如果數學唔合格人哋會唔會請妳做收銀呀？讀書亦都唔係得個分數㗎，識多啲嘢，可以幫到我哋生活，容易啲同人溝通，最重要係無咁易俾人呃呀。」有咁多顧慮咁怪之得可以咁勤力啦。




之但係我覺得佢最大顧慮係唔可以衰畀班姐妹睇。
我：「女神妳咁好學，我部洗衣機本說明書都重喺度。」
Q：「咪講廢話呀！你話過有得幫我洗衫係無上嘅光榮嚟㗎…」唉，有啲嘢叫禍從口出，駟馬難追。