為了實現媽媽遺願，我成為了女兒國唐僧: 996

蚊：「你咁快返嚟嘅…嘩！原來已經十二點！我竟然可以坐喺度溫咗咁耐書！」佢枱面放咗本QQ唔知喺邊摷出嚟嘅暑期作業，重有好多空白，當然係我成功走數嘅傑作…
Q：「係呀，妳今日已經好叻叻，可以休息喇。」
我：「今日廚餘，兩份芒果布甸，一份馬蹄糕…」
Q：「咪廢話啦，放低。」然後佢就同細蚊分咗一人一個芒果布甸，我就拎一大盒冷飯放雪櫃備用。
睇住呢個畫面，好似自己多咗兩個細妹咁，不過佢哋一個喺天，另一個喺地，屬於兩個世界，但我都好慶幸QQ可以同佢相處融洽，QQ搞人際關係嘅技巧實在唔睇得小。
蚊：「馬蹄糕唔係要整翻熱嘅咩？」
我：「甜甜地…凍食咪當甜品囉，細蚊，妳唔諗住打個電話返屋企嗱？」
蚊：「都無人關心我，返去做乜喎…等老竇下咗啖氣先啦，或者等到佢開工先。」乜話…裝修工人星期日唔開工喎，即係佢想喺度留到星期一？
我：「妳留喺度無問題，但係瞓邊…」
Q：「你張床唔係好多位咩？瞓埋你爹地都夠…」




我：「咁一係妳同佢瞓我張床囉。」
Q：「先唔制呀，你嗰邊硬磞磞，重有唔好污染我張床。」唓，明明琴日先瞓過嚟，扮晒嘢咁。
我：「其實細蚊都好細粒啫…係咪？」
Q：「無端端做乜要我哋迫埋一齊喎？貪玩咩…」
我：「喂…你知我忍得幾辛苦㗎啦，一陣我半睡半醒嗰陣，唔小心做咗啲壞事出嚟就唔係幾好。」
蚊：「你不朽都壞事做盡㗎啦，我重接受到㗎喎。」
我：「唔好啦，我同以前唔同㗎喇。」
蚊：「你咁驚變色狼，咁我瞓梳化囉。」
我：「唔使，妳瞓我張床啦，我瞓梳化。」
蚊：「吓，但係你牛高馬大張梳化邊夠你瞓呢？」




Q：「細蚊妳由佢啦，佢係鍾意喺度扮聖人攞光環。」
蚊：「一係你瞓先，我繼續溫書，到你瞓著晒我先上嚟囉，咁就夠晒安全。」難為佢諗得到。
「吱吱吱，咋咋咋。」細蚊電話響。
蚊：「喂…哦…同學度…嗯…有呀…嗯…知喇。」就收咗線…
我：「屋企人搵妳？」都好明顯啦…
蚊：「老竇打嚟叫我返去溫書準備補考。」
Q：「咁佢應該正常返？唔會再打妳喇掛？」
蚊：「佢半夜三更打我，我喊到隔籬屋報警添呀！」
我：「咁…妳今晚返去瞓？費事佢哋擔心啦。」
蚊：「返去囉，我都唔想阻到你兩個。」




Q：「細蚊，如果有乜事，唔安全嘅話可以隨時過嚟搵我哋㗎，一定會幫妳。」