為了實現媽媽遺願，我成為了女兒國唐僧: 993

嗯，百二蚊三個晚餐，重有三碗紅湯，三杯熱飲，情況係非常之理想，填飽個肚之後佢兩個又繼續戰鬥，QQ攞住兩本不限中幾嘅英文聖經，grammer in use同vocabulary in use，成個miss咁，見到都覺得恐怖；諗落自己啲英文一樣也也烏，係咪要去溫埋一份呢？不過放暑假溫書實在係太痛苦，又怕阻住QQ幫細蚊，所以我都係掟埋自己一二角算。
望住佢兩個就周身唔聚財，打機又唔係，瞓覺又唔係，睇鹹片就更加唔係，結果攞住部電話唔知轆乜好最後嘥晒啲時間。
蚊：「呀…我唔得喇！」細蚊發出哀嚎。
Q：「咁抖陣啦，妳加加埋埋都叫溫咗兩個幾鐘。」
溫兩個幾鐘，妳知唔知對我哋呢啲星斗學生嚟講係幾咁恐怖，邊似得妳可以放學返嚟就揸住本書一直坐到十二點，除咗食飯嗰半個鐘之外。
我：「我都差唔多落去返工，係呢，細蚊妳屋企人有無搵妳呀？」話就話唔介意做避難所，都唔想佢搞到咁。
蚊：「無囉，話明趕我出門口，重搵我嚟做乜喎。」
我：「咁唔見咗阿女咁耐，可能會擔心㗎嘛。」
蚊：「邊有咁易吖，以前係你度吽到十一二點佢哋都未必搵我㗎啦，有乜分別啫？」喂…唔使咁大聲喎。
Q：「細蚊，我知妳嘅成績激到老竇好嬲，但係，妳屋企人佢哋平時嗰陣有無大問題㗎？」




蚊：「欸…都係咁啦，讀書就幫唔到我㗎喇，中學啲嘢佢哋大部份都唔識，亦都好少關心我，不過我都好似唔係幾使佢哋關心，老竇都有正常返工，阿媽都有洗衫煮飯，細佬就…有時會扭計同蝦我囉，佢好似叻過我啲，所以爸媽鍾意佢多啲，都係咁㗎啦。」
Q：「除咗喺屋企之外，會唔會有啲乜嘢活動？」
蚊：「間唔中會出街食飯囉，如果老竇賭馬贏咗錢，咪可能食好啲，同埋去買玩具畀細佬，都會去租單車踩下，佢哋生日嘅話有機會帶我同細佬去海洋公園，不過佢哋就唔會一齊去，因為大人飛好鬼貴，而且去到都只係負責睇住我哋兩個玩。」
Q：「就咁聽落都算係正常嘅。」
蚊：「都係咁啦，我哋呢啲屋邨家庭…唔家嘈屋閉就已經還得神落，唔好講有啲乜要求。」
Q：「嗯…有機會好過我爹地媽咪添。」
蚊：「應該…唔會呀？」
Q：「由我懂事起，我媽咪一餐飯都無煮過畀我食，連淥個公仔麪都無呀，我覺得佢剩係識兩樣嘢嘅啫，就係使錢同氹男人開心，而我爹地呢，我唔知佢過往嗰幾十年贏咗幾多錢返嚟，我只係知佢上年一鋪就輸到要賣埋層樓走人消失。」
蚊：「Queenie，對唔住呀…」