thriXt Qantasy 純文字安眠之作 (New: - U2K - 一直上架): 992

蚊：「嗚嗚，太感動，Queenie妳實在係太好人。」
Q：「咁事不宜遲，唔好嘥時間，而家就開始溫啦。」
蚊：「吓，但係我乜都無帶喺身喎，可以溫乜？」
Q：「唔緊要，我有form 2嘅數學書喺度。」
蚊：「但係你哋嗰本好似係英文嚟…」
Q：「放心啦，我會解釋㗎嘛，同埋做住淨係得數目字嘅題目囉，呀爽你有無上年嘅中英文書呀？」
我：「呢個…我唔肯定，要摷下先知有無。」
Q：「咁你摷下啦，如果無就上網download嘢嚟做，一樣嘅啫。」無論點諗都唔明佢點解可以咁熱衷學習。
我：「中二嘅嘢妳重記唔記得㗎？」
Q：「吖！你敢睇小我？中西史嗰啲就話考完掉咗佢啫，主科中英數一定無問題，而且目標只係合格。」




然後佢兩個排排坐喺張飯枱度溫書，講真我第一次見細蚊溫書，望住佢哋咁樣我心情實在難以形容。
如果呢個世界得我哋三個人，應該都可以組織一個家庭？我會唔會因為QQ嘅外表而冷落細蚊？唉，多諗無益…
我：「其實都差唔多到晚飯時間，我諗緊不如叫外賣？」
Q：「你話事啦，我哋要專心溫書，你偷懶唔想煮咪去買燒臘飯囉。」
我：「唔係呀，我諗緊我哋有三個人，不如嗌熊貓？」
Q：「傻咗呀你，嗌外賣app唔平㗎喎…」
我：「唔係搵熊貓送呀，我自己落去自取，今個月有張百五蚊減三十券，我哋一人一個晚餐就啱啱好，重平過堂食添。」
Q：「乜你用到㗎，平時又唔見你嗌嘅。」
我：「用到…爹地account嚟，而且唔使我找數添。」
Q：「原來你有啲咁嘅福利㗎，點解我唔知嘅？」




我：「咁餐餐嗌就梗係唔得啦，一次半次無乜所謂，而且都係為咗用佢張優惠券咋嘛。」
Q：「哦，咁平就嗌啦。」
我：「不如妳哋睇下餐牌先，呢度有好多款。」
Q：「幫我揀啦，唔想諗，唔好又係意粉就得。」
我：「滑蛋蝦仁飯好唔好？」
Q：「OK，唔熱氣就最好。」其實我已經大概知佢口味。
蚊：「咁你諗住嗌乜？」佢轆轆下好似做MC咁頭痛。
我：「咖哩牛腩飯。」當然嗌啲自己唔煮嘅嘢食。
蚊：「我都想食咖喱…」
Q：「唔得呀，妳身體有損傷，唔可以食刺激性嘅嘢。」




蚊：「咁…咁…雪菜肉絲炆米啦。」真係聽話。
我：「好，我落單喇，十分鐘後就落去攞。」第一次感受到人多好辦事嘅道理，冷氣又多一個人嘆，wifi又多一個人用，但如果成屋女人我真係搞唔掂…