為了實現媽媽遺願，我成為了女兒國唐僧: 989

蚊：「無所謂，乜都好啦…希望唔會好貴…」
Q：「都咁嘅樣重講呢啲，嚟啦，趴喺度我幫妳搽。」
然後我就睇住右女神照顧我EX，呢刻嘅心情都幾複雜。
QQ細心又溫柔咁呵護細蚊對筷子腳…嗯，普通筷子啦，未至於幼到飢民咁嘅；但細蚊亦難掩痛苦嘅表情，同一時間俾女神服侍又好似有啲爽…而佢一直望住我。
蚊：「唔止隻腳㗎…我入面屁股都…」
而QQ就輕輕咁抽開細蚊條波褲，我都唔好意思望落去。
Q：「都黐線㗎，佢有無當妳係佢個女！喂！死人交叉仔，我唔好意思幫佢，不如你嚟啦。」
我：「吓…男女授受不親，我咪更加唔好意思？」
Q：「你講乜廢話呀！佢係你EX嚟㗎，有邊忽你未睇過呀？！咪同我扮嘢，又話自己以前對唔住人哋，而家咪俾你好好咁補償返！」對住女神我永遠都駁唔到嘴。
於是我坐喺自己床上面，接過QQ嗰甖cream，再小心翼翼咁拉開細蚊條波褲同底褲去到pat摺…我第一次因為睇到女仔個屁股而咁唔開心。




然後就好溫柔咁搽啲cream上去傷痕上面；細蚊，一樣有菊花，菊花下面生咗啲草叉出嚟，唔得…我要專心。
Q：「搽完有無好少少呀？」
蚊：「都唔錯，涼涼地咁…雖然都係痛。」
Q：「痛就點都無辦法，一定要等過幾日散㗎喇，最多都係食必利痛，但好似效用不大。」
蚊：「咁又唔使，我重頂得住嘅…」
幫細蚊搽完pat pat，我又好小心咁拉返佢兩條褲上去。
Q：「妳…今次考試點樣呀？」
蚊：「都有好多科唔合格…」聽得出連佢自己都驚。
Q：「咁妳有邊啲科合格呀？」
蚊：「嗯…PE啦，home e啦，音樂啦，VA啦，重有中史。」一聽都知PK，合格嘅全部都係啲無關痛癢嘅科目；我好想攪爛gag讚佢home e合格叻過Queenie，但我知道而家絕對唔係一個合適嘅時候。




Q：「就咁聽落都好遴迍喎…」
蚊：「係呀，星期一派成績表我已經收埋咗唔敢攞出嚟，直到老竇今日係咁問我…結果就攪成咁。」
Q：「學校嗰邊有無話點？會唔會要踢出校？」
蚊：「又唔會嘅，我哋學校收生不足唔敢亂咁踢人，佢俾我哋呢啲唔合格嘅溫一個禮拜再補考返中英數，要有兩科合格先有得升班，如果唔係又留…」
唉，細蚊讀書唔叻，小學已經留過一次，再咁搞法真係唔知讀到幾時先有得畢業，雖然而家呢個年代學無前後，好多人讀到廿幾三十歲都重讀緊書啫。
Q：「妳本身…之前有無咁差㗎？」
蚊：「都好少少嘅，中文英文合格邊緣…因為…今次考試嗰陣我顧住打機，攪到無時間溫書又唔夠瞓…」
吓，第一次聽到女仔話因為打機而荒廢學業。