為了實現媽媽遺願，我成為了女兒國唐僧: 990

我：「無理由㗎喎，以前妳上嚟我度都係睇我打機自己唔打嘅，點會無端端咁沉迷？」今次我開聲先。
蚊：「唔同㗎！你玩來玩去唔係揸車就打打殺殺，我點會玩喎，我搵到隻換衫扮靚靚嘅app game，先一時忍唔住…」一早就講咗，做現代農夫係一件好辛苦嘅事。
我：「都未至於要玩到書又唔溫，覺又唔瞓呀？」
話口未完佢就攞咗部電話出嚟開game畀我哋睇。
蚊：「你睇下吖，係夏季活動嘅限定泳裝呀，我四套都攞齊晒！你知唔知道唔課金要攞齊晒到底有幾難？我瞓緊覺都每兩個鐘起一次身玩先上到榜咋！」
救命…呢啲左又限定，右又限定，年月日都限定嘅東東，小學就係咁打機嘅我當然一早就受夠。
我：「都無理由咁㗎，呢個世界好玩嘅game有成千上萬，妳永遠追唔到，攞到少少咪算囉。」
蚊：「呀！因為今期真係好靚嘛，你睇下先吖！」
係四套閃爧爧嘅泳裝，有比堅尼，有兩件頭，有中空流線型嘅…我都唔知自己講緊乜，重有其他配套例如背心短裙拖鞋水槍咁，著喺一個3D模組嘅女仔身上；重點嚟喇，當我想知除晒所有衣物會有乜睇嘅時候，原來最底重有兩塊迷你白布仔；係靚嘅，而家乜game都鬼火咁靚㗎啦。
QQ望完一眼反白眼咁滯，係抵激死老竇嘅。




Q：「但都唔可以咁㗎，唔通就成世對住隻game咩？」
蚊：「你哋都唔明！我差唔多成年無買過衫喇，媽咪揀嗰啲又全部細路女咁！我係喺隻game入面先可以…」
有男仔喺game入面係傳說，亦有宅男喺game同乃木坂相親相愛，而我就寧願睇下歐洲街景同揸飛機。
Q：「點會呢！我明喎。」佢搭住細蚊膊頭。
蚊：「妳真係明？雖然妳而家已經唔係…」佢講唔出QQ家道中落唔再係富家女，但始終啲剩餘物資都唔係平。
Q：「明呀，有時人又真係要喺虛擬世界先搵到滿足嘅！就好似呢條友咁，大半年都無掂過女人喇，所以咪唯有日日睇AV嚟滿足自己囉！」喂？！QQ妳攪乜鬼？
蚊：「吓，乜佢真係可以咁耐都唔掂女人㗎？」
Q：「係呀，有我喺度看實佢同阻住佢，重邊有機會呢？妳唔係諗住我會咁好死益佢呀，望就有佢份。」
蚊：「咁又係，Queenie姐姐妳咁正使乜show佢。」
好喇喎，妳兩條女有無當過我係存在喺呢個空間？




Q：「本來琴日有個女仔想接近佢㗎，但佢竟然請人食檸檬。」
蚊：「吓？真㗎？點解嘅？佢唔係乜都食得落㗎咩？唔通個女仔好恐怖，令佢飢都要擇食？」
Q：「唔知呀，可能嫌我喺度阻住佢同女happy咪索性唔拍拖囉，個女仔正正常常，係個大波妹嚟。」