為了實現媽媽遺願，我成為了女兒國唐僧: 987

我：「唔係咁玩我哋呀，個天咁奀皮嘅咩？」
Q：「點知喎，其實最後一日重搞咁多嘢做乜，又唔係未試過，不如留喺屋企安安靜靜過埋佢咪算囉。」
我：「都係嘅，最後一日對住妳，再講拜拜都唔錯。」
Q：「咁如果聽日係我末日但唔係你嘅未日呢？」
我：「咁嘅話，我會…盡我所能陪住妳去到最後一分一秒，等妳唔好難過，同妳謦欬，講啲嘢畀妳聽，又聽下妳最後想講乜，有乜嘢未完成嘅心願我會幫妳實現埋佢，如果我做到嘅話。」
Q：「咁偉大嘅咩，乜唔係趁最後一個機會對我為所慾為？」女神講嘅說話好似無時無刻都充滿陷阱。
我：「點會喎，妳明知我惜妳，都忍咗咁耐咯…去到最後一刻重邊捨得傷害妳，我只希望妳喺呢間屋過得開心。」
Q：「多謝你，我而家都好開心，但係去到末日之前，可能係我想要呢，可以喺高潮之中同地球講再見都唔錯…咁，我消失咗之後你會點？」我心諗咁妳唔係應該要搵男朋友先咩？定係貪我近水樓台夠就手…
我：「得返自己一個，應該會喊好多日…不過妳放心啦，我會繼續遵守約定，亦都會繼續畀心機讀書。」
Q：「咁如果聽日係你嘅末日但唔係我嘅末日呢？」




我：「都一樣啦，有妳喺我身邊過埋最後一刻就好夠，不過以後妳就要學識自己洗衫同整嘢食喇，同埋我會叫爹地畀妳喺度住到可以照顧到自己為止…」
Q：「唔使咁擔心我喎…如果我要睇住你消失，消失前我會推你落床，實現晒你一直以嚟幻想中嘅願望。」
我：「唔好咁諗我啦，我係鹹濕…但喺我眼中妳過得開心先係最重要㗎。」初初嚟到我對佢嘅肉體當然充滿無限遐想，但漸漸相處落嚟，我最重視嘅嘢已經變成佢嘅內心。
Q：「唔好諗住我好想服侍你，只係…假如我知道你要帶住遺憾咁消失，而明明當你喺度嘅事候我有能力畀到你…咁樣喺你消失之後我實好唔開心，諗起就會喊得好慘，所以我只係想以後自己好過啲。」
QQ有時好感性，但個方向好難明白，好奇怪。
我：「傻豬嚟嘅，其實唔使做青頭仔就已經無乜好遺憾啦，不過妳放心，我會好好睇住自己唔會俾自己突然消失，如果發現有絕症嘅話再嚟問妳攞奬品啦，哈哈…」
Q：「唔准有絕症呀！你重要養我㗎！」
我：「係係係，我盡量食少啲味精呀下…」
Q：「嗯，可以一直…平靜咁生活落去就好。」