thriXt Qantasy 純文字安眠之作 (New: - U2K - 一直上架): 986

Q：「你…太多幻想喇！其實無乜感覺㗎咋！分明係你自己喺度諗緊射啲嘢入去女仔身體入面有幾爽！」
我：「咁呢啲嘢，大家一齊爽嘅啫，如果唔係攪嚟做乜喎…」虧我講得出，對唔住細蚊，嗚嗚…
Q：「你就爽！煮煮下嘢食你都可以硬J，不知所謂！」
然後佢就㧬返我入廚房，啲意粉亦剛好al dente。
嗯，QQ有拖拍，有美好嘅性生活，有得吃喝玩樂，應該同男友過得幾開心？作為佢朋友我當然想睇到佢開心，而唔係日日屈喺屋企同我一齊捱…至於你問我難唔難頂，少少咁啦，最緊要係慣咗，QQ同佢男朋友一齊呢件事同我又無關嘅，亦唔係特登要我難受；總之我重頂得順，如果唔係我一早投降斬纜，琴日接受韻婷表白同佢一齊。
當然應承咗媽咪都係原因之一，又唔想令啲女仔難受。
而每次睇住QQ食我整嘅嘢到飽肚，就係最幸福嘅時間。
今日終於比較得閒，我開咗傳說出嚟懷緬咗兩鋪；QQ嘅日常就係寫下嘢，整理IG，磨指甲腳甲…真係一齊住先知睇女仔整腳甲係一件咁正嘅事，又要屈起隻腳，又要真理褲，又要烏低身，又要飛釘；我相信佢一定知道我喺度昅緊佢，只不過已經係默許咗。
我：「諗落我哋嘅生活都幾平靜下。」自從佢安頓好喺度之後，雖然偶有阻滯，但總算全部安穩度過。
Q：「好正常吖，我哋只係普通人，又唔係小說主角。」




我：「哈哈，係呀，小說主角真係好忙，一時又要穿越，一時要打喪屍，一時要練功升lev擦怪修仙，一係就男女關係七國咁亂糾纏嗌架，隨時要生離死別添！」
Q：「而且我哋呢度無人有絕症，無人失憶，無人遇到交通意外永久傷殘呢啲老套嘢，就連先生都係正正常常唔會用權力欺壓學生，踢波又無啲專踢傷人嘅茅躉，無同學參加黑社會喺學校做黃賭毒，想世界末日都難呀！」
我：「其實世界就唔會末日嘅，係人類末日啫。」
Q：「如果聽日係世界末日，你諗住點？」
我：「我…諗住，欸，叫某隻喵作者唔好擺爛掛。」
Q：「吓？你講乜，唔係病咗未食藥呀？」
我：「唔係，無事！呢啲嘢天機不可洩漏，唔知好過知…」因為佢拎唔拎得起個keyboard關乎我哋存亡。
Q：「認真呀，咁你會有乜打算？」
我：「咁嘅話…最後一日咯，用晒啲錢同妳去玩？去廸士尼？去五星級酒店食餐飽？再同妳去shopping？最緊要係令妳開心，唔想妳帶住遺憾離開呢個世界。」
Q：「傻豬嚟嘅，使晒啲錢如果突然唔末日咪PK囉？」




右女神諗嘢夠晒跳脫，唔俾佢玩謝就奇。