為了實現媽媽遺願，我成為了女兒國唐僧: 940

德：「讀DSE呢幾年，以為自己睇得好透，埕埕塔塔嘅嘢點會有結果，咪盞阻住自己讀書，不如做啲自己有興趣嘅嘢重好啦，結果一入咗嚟，就出唔返去，唔經唔覺就已經成為咗中學入面最大嗰一個，嚟緊入到U可以做返最細，睇嚟係時候改變下。」
我：「嗯…你覺得自己開心咪得囉。」
德：「睇咗咁多年裙底相，都未試過親身睇，我都幾失敗。」佢望住部相機若有所思咁。
我：「喂…喂喂…」
德：「放心啦，睇完我就會鏟，亦無得分享畀你。」
真係好似QQ咁講，佢從來無啲唔見得光嘅相流咗出嚟？
我：「係呢，大學係咪放咗榜㗎喇？」
德：「JUPAS未放呀，不過我都OK，係睇下入邊間。」
我：「咁我恭喜定你先，你遲啲叫瘟神請返你食飯啦。」
拜託完佢之後我又行返上看台，啲女神好似發覺咗我嘅古怪，QQ，YY同Zilvia隻腳都夾到實一實，當我feel到佢哋啲眼神同我撞埋一齊嗰陣就急急腳走返去自己嗰邊。




W：「好似好忙咁喎。」
我：「無辦法啦，畢竟自己有份落場，都要做下嘢嘅。」
W：「陣間落力啲踢，食完我啲曲奇應該會犀利好多。」
唔好咁對我啦…呢場賽事我本身就夠多包袱。
我：「欸…多謝妳，我唔會令妳失望。」
W：「你話㗎，如果踢得唔好要罰。」
我：「唔好掛…咁都要罰？罰乜嘢呀？」
W：「你左右手唔對稱，或者我都可以幫下你。」
聽完呢句，我嚇到唔敢出聲，希望妳只係隨便講下。
然之後我哋稍為安靜咁睇波，比賽好快就已經嚟到三比三，然而我嘅心神完全放唔到落眼前嘅球賽。




健：「喂，差唔多落定去準備下喇。」
落到去場側邊，又係例牌嘅拉下筋做熱身，聽下瘟神講廢話同隊員打下氣，不過唔知點解今次連所有社幹事都落晒嚟，好似讕係凝重咁，而且QQ都…
瘟：「各位親愛嘅社員，呢一仗就係我哋今個學年最後嘅一戰，雖然我哋而家已經坐亞望冠，但係我哋係絕對唔可以鬆懈嘅，因為食粥食飯就係睇呢場波！假如我哋贏咗嘅話，唔係，係一定要贏！我同副社長就會安排今晚嘅慶功宴暨收爐飯，一定唔會令大家失望，所以你哋一定要盡全力咁去輾壓對面！」