為了實現媽媽遺願，我成為了女兒國唐僧: 941

企喺瘟神隔籬嘅就係副社長，其實我唔識佢嘅，不過睇落都係一副公子哥兒唔使憂柴憂米咁嘅款；唔知瘟神做咗啲乜操作扯埋佢落水，明明贏咗就已經有六千蚊，雖然呢件事在場應該係得我知。
「無錯，為咗各位嘅福祉我同社長兩個絕對係會出錢又出力嘅，你哋嘅汗水一定唔會白流！另外，我哋社嘅其他幹事都一定唔會令你失望，今次費盡唇舌我哋邀請到三位美女嚟奬勵大家，佢哋將會喺今晚嘅慶功宴上抽籤揀出隊員向佢哋送出香吻一個！」
「嘩！係咪真㗎！」「咁都得？！」「很想要吧！」
一眾隊員都變得興奮鼓躁起嚟，原來…咁嘅嘢都可以攞嚟做奬品，QQ…點解妳要陪佢哋癲。
Q：「乜喎！明明我就唔係幹事，做乜拉埋我落水？」
係囉，做人要學識say no，對住男人嗌唔好先得㗎嘛。
瘟：「咁…妳係我哋社嘅吉祥物。」
Q：「吉你個頭呀！係咪想撩架打呀？」
瘟：「咁…係形像大使兼啦啦隊指揮員。」
「你哋好嘢呀！夾硬擺我哋上枱，好似無應承㗎喎！」




「我抽到你嘅話實第一個咬爛你塊面。」
財政同文書兩位姐姐睇嚟都唔係好惹咁。
「稍安無躁，我哋都知道你哋幾位喺足球賽事上面幫唔到啲乜嘢手，但頭先問妳哋意見妳哋都答咗會鼎力相助…」
「好嘢呀你哋，走！我哋過去綠社嗰邊幫Bubble手打氣！」女人真係好恐怖，話叛變就叛變。
三個靚女過咗去，連Bubble姐姐都呆咗。
「綠社嘅隊員加油！幫我砌低紅社！」
「綠油油！誇啦啦！無得頂！送頂綠帽畀瘟神！」
結果季軍賽就喺我哋場邊嘅叫囂聲之中落幕，比數係四比三，我都唔記得邊邊贏嚕。
過咗陣我哋就上場，明明只係落嚟跑下踢場波，結果…
我望望邊線嘅德爺，佢手握兩部相機向我打咗個OK手勢，呢個又係外星人嚟嘅。




QQ同YY間唔中望下我，兩個都若有所思咁，怕咗佢哋…
Wendy更加係定睛咁留意我，正常嘅，佢為咗我先嚟。
對面嘅阿健，睇得出佢非常之有鬥志，一副絕對唔想輸比我嘅樣，都唔知佢係為咗賽事定為咗我同佢之間嘅賭注。
傻仔，我一早就讚咗Bubble師姐波波又大又靚好想揸，所以…今日就輪到你喇！雞聲一響，比賽開始。