為了實現媽媽遺願，我成為了女兒國唐僧: 939

W：「咁遲㗎你，我重早過你嚟到。」
我：「咁我係嚟踢波，又唔係嚟睇波嘅…」
W：「點呀，啲曲奇好唔好味呀？」
我：「好呀，全靠妳我先食得飽咋。」
然後佢又望住我唔出聲，今日硬係怪怪哋咁…
我：「呀，黃社攻門喇，彈咗出嚟，再射，入咗…」
W：「係呀，今日兩隊都係咁射門，好好睇。」
對唔識足球嘅人嚟講，多射龍，大比數就會覺得精彩，唔通鍾意睇你喺度搓嚟搓去咩；而我相信實情係呢兩隊敗者都無乜心機踢，個個向前衝攻晒去射龍就算，搶到波就唔再防守，打死罷就。
阿康坐我隔籬，跟住就係阿健肥豬，睇咗一陣就中場。
我：「我有啲嘢搞，行開一陣先。」




跟手我衝落去搵瘟神，問佢攞咗部fuji instax。
瘟：「咁我有無嘢要做㗎？」
我：「無，你負責踢波就得，中場嗰陣就簽名同寫嘢。」
瘟：「好，暑假有無妹妹仔陪我玩就靠晒你。」
然後我又衝去場邊搵德爺，今日得佢負責影相，喺猛烈嘅太陽之下佢要同啲球員…呀唔係，係同個波一齊跑嚟跑去，而且佢重要猛到夠膽死人哋喺個場踢波，佢走埋入去影相，連球證都無佢符，所以佢早就大汗疊細汗兼且條氣都未抖順。
我：「師兄，冒昧打攪你，有啲嘢想搵你幫手。」
德：「又係你？又想嚟打劫女神相？」
我：「唔係，係嚟拜託你幫我哋社長影兩幅最型仔嘅相。」我指一指手中部instax，佢見到就扁晒嘴咁。
德：「你知唔知用呢部嘅（ge2）嘢影運動嘢到底有幾難？又無LCD，重要得十張菲林。」
我：「知呀，所以就嚟請求德高望重嘅你出馬。」




德：「好，我就係要呢啲…點呀，條友要嚟溝女用？」
我：「類似啦…未去到溝嘅。」
德：「有無乜要求，我唔知影唔影到㗎喎。」
我：「型就得，交畀你發辦，呢度最專業係你，信晒你…呀！有一個要求，中場就要收到貨。」
德：「呢個要求都幾無理取鬧，不過夠晒挑戰性…喂，畀啲嘢你睇吖。」係四個中三女神嘅相。
我：「哦，咪又係佢哋。」呢啲梅蘭竹菊已睇慣咗。
德：「你唔係睺住人哋嘅咩？」
我：「睇下靚女啫，對住女神心動係好傻仔㗎。」
德：「哦，咁你睇下呢張。」係我望住韻婷嘅尷尬樣。
我：「喂，做乜無端端影我喎！」上次仆街又係。




德：「你個衰仔，睇嚟又有斬獲喎。」
我：「唔係啦，隔籬位，好朋友嚟啫。」
德：「但我睇落你兩個都好開心咁。」
我：「都OK嘅，好似而家咁已經幾好。」
德：「影咗咁多年相，見盡人生百態，以為自己知道好多嘢，但諗返轉頭，好似乜都無經歷過咁。」
我：「欸…又會無端端咁感觸嘅…」