為了實現媽媽遺願，我成為了女兒國唐僧: 935

我：「第一場係季軍戰，咁早去做乜，我唔係特別鍾意曬太陽…係呢，做乜咁趕返嚟換衫？」
Q：「乜呀，今晚可能直落㗎…費事走來走去啦。」
我：「今晚？即係贏咗妳會一齊嚟食飯？」
Q：「嗯，你認為瘟神會唔會唔預我呀？」
都唔知佢哋想點，瘟神又話放棄佢，又繼續保持聯絡…
我：「呀，咁妳約咗佢哋喺邊呀？」
Q：「瘟神喺學校打點緊啲嘢，我會返一返去先，然後同班八婆搭的士去球場，你唔使理我。」
做乜喎，佢好似唔多高興咁嘅。
我：「妳可唔可以幫手提瘟神記得借學校部即影即有呀？」差啲唔記得我重有任務，點解我會咁忙…
Q：「可以，但又關你事？你去踢波定去影相㗎？」




我：「踢波…唔關我事嘅，我驚佢唔記得啫。」
Q：「乜你會關心佢？古古怪怪咁…」
我：「條裙咁短唔驚走光咩，又唔打底。」我攤喺張床上面揭起佢條裙，入面係一條粉紅底底。
今日佢嘅打扮係名貴波鞋一對，薄荷色不及膝百摺裙一條，白色包膊露臍背心一件，紫色閃石花花耳針耳環一對，米諾夫斯基粒子濃度三十七%妝扮，衣不蔽體女仔一個。
Q：「咪同校服差唔多，食你嘅曲奇啦。」
我：「做乜喎，人哋焗多咗分啲剩餘物資畀我咋，唔想浪費啫，佢乜都無做過，妳唔使擔心。」
Q：「我有乜好擔心，係驚你搞唔掂然後又一身蟻。」
女神妳中文咁好，可唔可以解釋下擔心同驚有乜分別？
我：「唔會啦，下年都唔同班…」
Q：「哦，希望只係我諗埋啲無謂嘢，一陣場波唔得閒同你打氣喇，自己畀心機啦。」即係點啫？係咪想幫個社打氣，但不包括我在內。




我企咗起身，打開雙手扭抱抱，而佢亦都配合攬返住我。
我：「放心，我一定會為社增光。」實情係我要送個傻仔落地獄，等佢接受奶神嘅制裁。
Q：「低B。」可以咁就夠，為咗妳，我可以拒絕任何女仔。
我：「咪住，妳唔係要返西九換衫咩？再返學校會唔會好怪，而且時間上…」雖然YY實唔會踢穿佢。
Q：「係喎…搭的士？算，都係同佢哋講喺球場等…咁我幫你send message提瘟神攞嘢啦。」
我：「咪住，都係唔好！」
Q：「又做乜呀，唔係我send message都唔鍾意呀？」
我：「唔係呀，我同妳有乜可能熟到吩咐妳提埋佢啲無謂嘢，而且我住咁近都唔合理。」
Q：「又係喎，咁你自己搞掂佢啦，唔得閒服侍你。」