為了實現媽媽遺願，我成為了女兒國唐僧: 934

我：「嗯，唔排除合作有機會擦出火花嘅。」
Q：「未必咁易，佢哋都係好正經咁去專注做一件事。」
唓，妳都係想講我無嚟正經，但係我認㗎…開心咪得囉。
師兄打完套拳，當然有服務觀眾嘅破板環節，首先有Uranus嘅直拳，手刀，再到師兄嘅三六零旋風腿，掛腳劈同埋二段踢，Uranus為咗就返個高度重企係張凳上面攞木板；今日的木板睇嚟都無乜個人思想，全部都應聲斷開，咁我無理由懷疑木嘅真假嘅，但假如換做酸枝，黑檀木呢啲一定更加精彩，重要係斜切木板，嘻嘻。
唔知有無機會可以借塊木板嚟玩下，我都想知要幾大力先斷。
執返木板碎，鞠躬，表演完結。
我明QQ點解話Uranus難同男仔開始嘅，氣場太強有袪蚊作用，普通男仔應該唔會想挑戰。
Z：「咁我哋去後台搵埋Uranus就去食飯咯。」
Y：「嗯，行啦，我未食早餐已經肚餓。」唔怪之得佢頭先要搶我嘅曲奇食啦…
Q：「Bye bye傻瓜。」然後佢哋就走咗。




隔籬個小師弟望住我，好似喺度質疑緊我點解可以同三個女神打交道，乜喎…你估我好想㗎？
初初未必好想，而家就好想，無咗QQ我都唔知點生活落去，而YY都幾好玩嘅，如果佢哋有一日為咗爭我大打…
接住落嚟嘅節目係英文朗誦…使唔使中英數都齊晒，搵個神童出嚟背丌，悶到我吖…見無乜熟人我就打道回府，經過街市買咗盒叉燒飯。
一路食我就一路細思極恐（編按：非成語，乃網絡潮詞，本人極討厭。），雖則呢間燒臘鋪一向往績良好，而我個肚亦都係勇氣可嘉，但風險始終係一息尚存，希望唔會東窗事發啦，早知未雨綢繆返自己公司買飯。唔知班女神們而家咬緊乜呢？點都好過我嘅，但而家QQ識搵下錢，所以我都絕對唔會講啲乜。
食完飯我又咬咗兩塊曲奇，係幾好味嘅，至少好過已經厭晒嘅黑罐曲奇…Wendy…唉，唔知佢諗緊乜呢？如果佢對我有好感，我同佢表白嘅話應該會好開心吧，佢會感動到喊再一口應承？面紅扮矜貴話考慮下先？感情勒索要我追佢？定係…我哋做住朋友先…呼…想揸…摸摸毛毛…呼…
過咗陣我俾啲沙呢弄送嘅聲音嘈醒咗，一擘大隻眼又見到QQ剩係著住底衫褲喺度摷緊嘢，你話嘞，日日望住啲咁嘅場面又有乜可能同第二個女仔談戀愛呢？
我：「呀，你返嚟嗱？」我望住佢條pat底線講。
Q：「咪返嚟換衫，你重瞓，唔想上場呀？」