為了實現媽媽遺願，我成為了女兒國唐僧: 867

丁：「啊，十二章對對？小心啲打喎，我實睇住你有無換牌。」常言道，對對糊好難估，通常呃埋自己，單吊眼打邊隻就嚟邊隻。
而我哋就只能靠睇佢打過乜牌嚟打。
C：「正花！補花！」啊，牌面七番，係唔錯嘅。
不過佢攞咗牌之後就吽咗好耐，可能呢隻好難食，但又極易出銃，Gabriel似係清一色索子多到突章嗰種，蜜絲就碰咗一楷萬子，YY就彷彿已經發緊夢求㞗祈打，左砌下右砌下扣下牌咁。
諗咗一諗，佢打咗隻南出嚟。
G：「YY等等。」佢伸手出嚟。
Y：「碰都要諗？」
G：「可以諗下做唔做清一色嘛。」
Q’：「唔使諗，我想睇靚靚妹妹仔裸泳。」
然後佢伸手翻開啲牌，二二三三三四四四索發發發南南門清…




G：「唉喲，人哋想食綠一色㗎嘛。」
Q’：「綠你個頭！快啲收工夠鐘玩水喇。」
G：「其實妳有無綠過我個頭？」
Q’：「呢啲嘢唔知好過知啦，驚咪休咗我囉。」
絲：「混對六番，字牌兩番，無花一番…Charles你攞四隻花咁多嚟做乜，留返一隻塞畀佢咪好囉，九番五一二，好對唔住…」
Charles個樣唔似有幾懊悔，只係呆下呆下咁，Priscilla就當然無眼睇；俗語成日講贏頭輸尾，當初揸YY對波揸得幾開心，而家就受返晒。
丁：「好咯！下水禮要開始！」花生友開始歡呼。
最高呢層甲板喺船尾嗰邊有個開口位，似係攞嚟扣瀡滑梯嘅，靠左右兩枝彈弓栓鎖住，按道理一個小朋友係唔容易打開嘅，除咗啲好興奮嘅大小朋友…
絲：「喂！呢度無你嘅事！返去樓梯嗰邊，唔好俾其他人上嚟。」
丁：「點會無我嘅事，我係負責人命安全…」




佢未講完就俾Gabriel拉返去船頭，同埋Charles一齊，好似蘇聯佬拖實阿龍阿Ken咁。
我：「咁…我使唔使過埋去？」
Q’：「扮乜嘢吖你，你係贏咗嗰個。」
Y：「喂，你企喺公主後面遮住，唔好益班仔！」
丁：「死人Xavier咁大嚿遮住晒！我哋睇乜呀！」
絲：「收聲呀！loser！」
大約兩層樓高，我喺公主後面就睇唔到佢表情嘞…
Q’：「Priscilla，唔會太困難吖嘛？」
P：「我有啲驚…」聽到少少口震嘅聲音。
Y：「妳驚跳落去定驚除衫呀？」




P：「我驚跳落去…」
絲：「咁就簡單啦，除衫就話無辦法啫，跳落去嘅話絕對唔會有事，大把人會睇住妳，呢度啲水有四米左右，落到去伸手爬就得，唔會撞底嘅。」
Q’：「放心啦，落到去游一陣，Xavier會嚟接妳。」