為了實現媽媽遺願，我成為了女兒國唐僧: 814

Y：「你係咪當我低能呀，另外嗰啲係英文串字game，數獨嗰啲，如果部電話空寥寥好奇怪㗎嘛。」睇嚟佢都適合做女間諜。
我：「算啦，而家我都無心情㩒電話。」
我左望右望，其實都無乜特別嘅，男仔喺度打下機，女仔一堆喺度咇呢叭啦，就好似一堆中學生去學校旅行咁，係貴啲啫，無我想象中嘅晒命晒女晒得咁恐怖，我都安心返些少。
A：「喂！你兩條粉腸住西貢，最近又係你哋，最遲又係你哋，搞乜鬼呀！」
團長對住部電話怒吼，可能玩開音樂嘅關係，隻手掌喺度蘭花咁擺動，定係…團長諗住用念嚟制裁對面嘅人，不過佢好似差緊本書。
A：「作死你呀？！跑過嚟？做運動？全村人等緊你呀，隻船已經到咗！」YY亦都反咗個白眼。
喺我哋後面有架白色嘅遊艇喺度，有個男人將一箱二箱嘢運緊上去，睇嚟就係我哋隻船。
A：「三十秒就到？好…我信你，你趕唔切就自己租大飛或者游出公海搵我哋啦！我開始倒數，三十、廿九、廿八…」
要知道公眾碼頭上落位大家share用，長期泊喺度係會俾人屌死，呢個時候Helen亦都開始叫啲仔女上船先，而個團長真係一直hold住部電話喺度數…
大約過咗廿秒左右，一對男女極速咁向我哋跑嚟…嘩，不得了呀，兩個都好似三項鐵人運動員咁，無論身型，衣著，定係個樣都超掂，一時之間我都俾佢哋嘅outlook charm到。




「穌哥，唔使咁急喎，我哋知幾點泊船㗎。」
吓，穌哥？唔通團長重兼任埋耶穌，唔怪之得心口有個十字架喺度啦…
A：「黐線嘅咩你兩個，晨咁早跑幾公里過嚟。」
「唔做下熱身先邊有力玩，你唔好大驚小怪啦…」
「咪係囉，團長冷靜啲，畀個飛吻你，啜卟！」
按道理，呢對男女無可能唔係一pair，而個女竟然喺自己條仔面前送飛吻畀其他仔，認真黐線。
A：「準備上船啦…」睇嚟佢俾啲蜘蛛仔激到要慳返啖氣。
而呢個時候嗰兩隻嘢打開咗個水樽，倒啲水照頭淋，條仔就算啦，但條女呢…實在係太over…
Y：「鹹濕仔上船啦！望乜嘢望！？」
死火，呢度啲人太有趣，我差啲唔記得咗自己條八婆臭閪魔頭女朋友重係一直企喺自己身邊。




※※※※※
然而，喺某個傻仔上緊船嘅時候，喺同一個時空相隔咗十幾公里嘅地方發生咗以下一段插曲。
嘻嘻，個死人頭出咗去，我可以喺個廳度自由自在襯底衫褲嘞…