為了實現媽媽遺願，我成為了女兒國唐僧: 813

Y：「聽聞Queenie上年同佢有啲嘢，我無深究，反正又唔係細路女，佢自己鍾意啦。」
我：「妳喺度最熟嗰個係Queenie？係咪妳專搵啲叫Queenie嘅女仔嚟做friend。」
Y：「你咪黐線啦，有乜關係喎，我拉violin，佢拉viola，坐隔籬就自然多欬謦㗎啦。」
我：「佢男朋友…同你哋其他人好似有啲唔同。」
Y：「正常吖，之前大鼓有個中六男仔負責，不過為咗考DSE佢年頭quit咗喇，後尾Queenie捉咗條仔嚟，好似佢哋都係開始咗無幾耐，我見過佢三次㗎咋，唔算熟。」
我：「咁，妳同Priscilla有無牙齒印㗎？」
Y：「喂，我都係第一次見到佢真人㗎咋，可以有乜唔啱牙呀？不過呢，我中二入團嗰陣無同人講過我有仔，所以Charles曾經撩過我，嗰陣我扮無嘢玩咗佢一排，後尾佢知道無機…咪…呵呵…」
我：「好，明晒…妳唔鍾意佢？」
Y：「吓，淨係身高都輸晒啦，佢啱湊公主㗎喇。」
我：「嗯，Helen係乖乖女應該無錯啦？」




Y：「啱，超認真，平實，唔貪玩，相傳A0，啲家長尤其鍾意佢，覺得佢可以幫手睇住啲仔女，等佢哋無得曳，或者唔小心俾人食咗…你咁多問題㗎，係咪想入嚟幫手敲三角？」
我：「無呀，知多啲，等我可以順暢啲俾反應，亦無咁易講錯嘢得罪人啫。」
Y：「重有無邊個想問呀，或者睇啱邊個妹妹仔…」
我：「無啦，其他應該都係好正常中學生，大概…」
Y：「無感情問題咪正常囉，如果你未拍過拖，唔係同QQ過從甚密，你都只會重係一個低B仔嚟。」
我：「使唔使咁話我呀…雖然我唔係叻啫。」
呢個其實係有雞先定有蛋先嘅問題嚟，好似阿健咁，又點會識到女，識唔到咪繼續低B，係睇下去到邊一刻終於忍唔住，如果唔係都只會惡性循環；另外我識到QQ又真係令我改變咗嘅，起碼會正視自己嘅學業問題，學識咗搵錢，參加咗啲無乜謂嘅學校活動，對住其他女仔重越嚟越大膽…
雖然我唔知咁樣算唔算無咁低B。
Y：「有興趣咪喺度識下friend，玩得埋嘅話你隨時可以搵到好多著數㗎。」
我：「我又唔係啲咁嘅人嚟…」




Y：「其實去到邊都有好多怪人，你唔使睇得太認真嘅，同我放輕鬆啲玩一日就得。」
A：「好！差唔多齊人，重爭兩個麻煩友啫…」
團長佢捉埋班仔嚟，有五條仔…竟然一齊烏低頭喺度打緊傳說，睇嚟富有人家孩子嘅娛樂其實同普通人都相差無幾；另外有兩個妹，睇落又係中三四咁樣，似係玩得啲嘅，跟住佢哋隔籬喺度睇。
Y：「想玩可以join㗎，我裝咗十隻八隻game喺你部電話入面，費事你悶親。」
我：「唔係幾好嘅…妳又知我玩乜嘅？」